سینئر وزیر شرجیل انعام میمن نے پی ایس ایکس انڈیکس 100,000 پوائنٹس کی تاریخی سطح عبور کرنے پر سرمایہ کاروں کو مبارکباد دی۔

تفصیلات کے مطابق سندھ کے سینئر وزیر اور پاکستان پیپلز پارٹی کے رہنما، شرجیل انعام میمن نے پاکستان اسٹاک ایکسچینج (پی ایس ایکس) کے انڈیکس کا 100,000 پوائنٹس کی تاریخی سطح کو عبور کرنے پر اسٹاک ایکسچینج کی انتظامیہ اور سرمایہ کاروں کو مبارکباد دی ہے۔

ان کا کہنا تھا کہ یہ سنگ میل نہ صرف پاکستان کی مالیاتی منڈیوں کی بحالی کا عکاس ہے، بلکہ سرمایہ کاروں کے اعتماد کی بھی عکاسی کرتا ہے۔

شرجیل انعام میمن نے کہا کہ پی ایس ایکس کا تاریخی سطح تک پہنچنا ہماری معیشت کے استحکام اور ترقی کی ایک واضح علامت ہے۔ یہ کامیابی نہ صرف مالیاتی شعبے کی فتح ہے بلکہ اس کا تعلق ہماری معیشت کے تمام شعبوں کی ترقی سے بھی ہے۔

انہوں نے مزید کہا کہ پاکستان پیپلز پارٹی کی سندھ حکومت ہمیشہ معاشی ترقی، روزگار کی تخلیق، اور پائیدار ترقی کے لیے پرعزم رہی ہے۔ “ہم نے سندھ میں معیشت کی بہتری اور عوامی خوشحالی کے لیے معاشی اصلاحات اور ترقیاتی منصوبوں کو ترجیحات میں رکھا ہے۔”

شرجیل انعام میمن نے اس بات پر زور دیا کہ پیپلز پارٹی نے ہمیشہ سرمایہ کاری کے لیے سازگار ماحول پیدا کرنے کی کوشش کی ہے، اور جدید پالیسیوں اور بنیادی ڈھانچے کے منصوبوں کے ذریعے ملک میں سرمایہ کاری کے مواقع کو بڑھایا ہے۔

آخر میں انہوں نے تمام اسٹیک ہولڈرز سے درخواست کی کہ وہ پاکستان میں اپنی سرمایہ کاری کو مزید بڑھائیں اور ملک کی معیشت کے استحکام میں اپنا کردار ادا کریں۔