چارسدہ: عوامی نیشنل پارٹی کے صدر ایمل ولی خان نے بھی پی ٹی آئی پر پابندی کی حمایت کردی۔

گورنر خیبر پختونخوا فیصل کریم کنڈی اور عوامی نیشنل پارٹی (اے این پی) کے صدر و سینیٹر ایمل ولی خان نے چارسدہ میں مشترکہ پریس کانفرنس کی جس دوران ایمل ولی خان نے پی ٹی آئی پر پابندی کی حمایت کردی۔

ایمل ولی خان نے کہا کہ پی ٹی آئی پر پابندی کی حمایت کرتے ہیں، پی ٹی آئی غیر جمہوری رویہ رکھتی ہے، پہلے ہی کہا تھا کہ پی ٹی آئی گند ہے اور اس پر پابندی لگنی چاہیے جب کہ 9 مئی اور 24 نومبر کے واقعات پابندی کا بہترین جواز ہیں۔

ان کا کہنا تھا کہ اے این پی اور پی پی پی کے مابین نظریاتی جوڑ ہے اور ایک عرصے سے ایک ساتھ کھڑے ہیں۔ گورنر صاحب سے دہشت گردی اور کرم کے واقعے پر بات ہوئی جب کہ کرم واقعات پر تمام پختون غمزدہ ہیں۔

انہوں نے اعلان کیا کہ امن کے لئے ہر کسی کا ساتھ دیں گے لیکن گورنر راج مسئلے کا حل نہیں، گورنر راج سے صرف ضد اور انا پوری ہوجائے گی۔ وزیر اعظم اسٹیک ہولڈر کے ساتھ مشاورت کے بعد  گورنر راج کا فیصلہ کریں گے۔

اے این پی کے صدر نے بتایا کہ نیشنل ایکشن پلان پر عمل سے امن قائم ہوگا، نظریہ ضرورت کے تحت مسائل حل نہیں ہوں گے۔ اگر امن و امان کا مسئلہ بائی ڈیزائن ہے تو اس کا حل مشکل ہے۔

انہوں نے یہ بھی کہا کہ اس وقت ایک نئی جنگ کی تیاری ہو رہی ہے جب کہ اس جنگ سے پختونخوا اور بلوچستان تباہ ہو جائے گا تاہم ریاستی اداروں کو ہوش کے ناحن لینا چاٰہیے۔

دوسری جانب گورنر پختونخوا فیصل کریم کنڈی نے پریس کانفرنس میں کہا کہ اس وقت صوبے میں آگ لگی ہے اور صوبائی حکومت اسلام آباد میں آگ لگانے گئی جب کہ لوگ شہید ہورہے ہیں۔

ان کا کہنا تھا کہ صوبائی حکومت بانی کو چھڑوانے کے لئے اسلام آباد پر چڑھائی کر رہی ہے جب کہ احتجاج میں پی ٹی آئی کا کوئی لیڈر نہیں پکڑا گیا اور پنجاب سے بھی کوئی نہیں نکلا۔

گورنر پختونخوا نے کہا کہ امن و امان اور صوبائی حکومت کے حوالے تمام سیاسی پارٹیوں کے ساتھ مشاورت کر رہے ہیں اور پانچ دسمبر کو آل پارٹیز کانفرنس کرنے جا رہے ہیں۔

فیصل کریم کنڈی کہتے ہیں صوبے کو دہشت گردوں کے حوالے کیا گیا، امن و امان کے حوالے سے وفاقی حکومت سے بھی بات کریں گے، وفاق صوبے کو دہشت گردوں کے رحم و کرم پر نہیں چھوڑ سکتی۔

گورنر راج کی خبروں میں انہوں نے کہا کہ گورنر راج کے حوالے سے میرے ساتھ کسی نے مشاورت نہیں کی، میں نے گورنر راج کی بات صرف ٹی وی پر ہی سنی ہے۔

انہوں نے مزید کہا کہ امن کے حوالے سے آل پارٹیز کانفرنس میں وزیر اعلیٰ پختونخوا کو دعوت دیتا ہوں، میں خود امن کی خاطر سی ایم ہاؤس گیا تھا جب کہ آج میرا اور سی ایم کا ضلع دہشت گردوں کے نرغے میں ہے۔