اسلام آباد: وفاقی وزیر داخلہ محسن نقوی نے ایف ایٹ ایکسچینج چوک انٹرچینج اور سرینہ چوک انٹرچینج پراجیکٹس کا دورہ کیا ہے۔

دورے کے دوران وزیرداخلہ محسن نقوی نے دونوں میگا پراجیکٹس پر تعمیراتی کاموں پر پیش رفت کا جائزہ لیا اور منصوبوں کے انڈر پاسز اور فلائی اوور کی تعمیر کے کاموں کا مشاہدہ بھی کیا۔

محسن نقوی نے انڈر پاس کو صرف 43 دن میں  مکمل کرنے پر کنٹریکٹر اور اسلام آباد انتظامیہ کی کارکردگی کو سراہا اور کہا کہ فروری کے دوسرے ہفتے میں ایف ایٹ ایکسچینج چوک انٹرچینج کا مکمل افتتاح کیا جائے گا اور سرینہ چوک انٹرچینج کا جنوری کے پہلے ہفتے میں افتتاح کیا جائے گا، جو صرف 60 دن میں مکمل ہوگا، ایف ایٹ ایکسچینج چوک انٹرچینج میں شامل انڈر پاس 25 دسمبر کو ٹریفک کیلئے کھول دیا جائے گا۔

وفاقی وزیر نے دونوں منصوبوں پر 24 گھنٹے کام جاری رکھنے کی ہدایت دیتے ہوئے کہا کہ دونوں منصوبوں کو ہر صورت مقررہ مدت میں مکمل کیا جائے۔

اس دوران وزیر داخلہ محسن نقوی کی دونوں منصوبوں کی سائٹس پر کام کرنے والے ورکرز سے بھی ملاقات ہوئی، انہوں نے ورکرز کو شاباش دی اور انکی حوصلہ افزائی کی۔

محسن نقوی نے تمام ورکرز، کنٹریکٹر اور سی ڈی اے کو اسی جوش و جذبے سے کام جاری رکھنے کی تلقین کی اور کہا کہ کوشش ہے کہ اسلام آباد کے شہریوں کو عالمی معیار کی سہولیات فراہم کی جائیں، ان منصوبوں کی تکمیل سے اسلام آباد میں ٹریفک کی روانی میں واضح بہتری آئے گی۔

دورے کے دوران چئیرمین سی ڈی اے محمد علی رندھاوا نے دونوں پراجیکٹس پر پیش رفت کے بارے میں وزیر داخلہ کو بریفنگ دی۔

واضح رہے کہ ڈپٹی کمشنر اسلام آباد، سی ڈی اے کے سینئر افسران اور کنٹریکٹرز بھی اس موقع پر موجود تھے۔