کراچی میں رینجرز اور سی ٹی ڈی نے مشترکہ کارروائی  کرکے فتنہ الخوارج کے تین دہشت گرد گرفتار کرلیے۔

ترجمان سندھ رینجرز  کے  مطابق گرفتار ملزمان میں جاوید سواتی عرف بھائی جان، شاہد حسین عرف عمر اور اکبر زیب خان شامل ہیں جو  دہشت گرد ی ،قتل ، اقدام قتل اور بھتہ وصولی میں ملوث ہیں۔

دہشتگردوں سے ایمو نیشن اورد ھما کہ خیز مواد بھی بر آمد کر لیا گیا۔ ملزمان کا تعلق فتنہ الخوارج سوات گروپ سے ہے۔

ملزم جاوید سواتی عرف بھائی جان 2008 میں فتنہ الخوارج سوات گروپ میں شامل ہوا۔   ملزم سوات میں کمانڈر عمر الرحمان عرف استاد فاتح اور بن یامین کے گروپ کے ساتھ انتہائی متحرک رہا۔

ملزم کے دو بھائی شاہد اور زاہد سوات میں سیکیورٹی فورسز کے آپریشن میں ہلاک ہوگئے تھے۔ ملزم اپنی فیملی کے ہمراہ  سوات آپریشن کے بعد کراچی شفٹ ہوا  اور مختلف مقامات پر روپوش رہا۔

ملزم 2012 میں کراچی سے گرفتار ہوا اور سوات میں عرصہ تقریبا 14 ماہ تک جیل میں رہا۔

ملزم کے قریبی ساتھی کمانڈر عمرالرحمان عرف استاد فاتح، عبد الرحمان عرف شہزاد، حبیب اللہ عرف معاویہ  کنڑ افغانستان شفٹ ہوگئے۔

ملزم کے  کمانڈر عمر الرحمان عرف استاد فاتح ، عبد الرحمان عرف شہزاد اور حمید اللہ عرف اظہار سے  انتہائی قریبی تعلقات تھے۔

ملزمان شاہد حسین عرف عمر اور اکبر زیب خان 2010 میں غلبہ السلام میں شامل ہوئے۔بعد ازاں 2014 میں زکریا عرف انعام اللہ  فتنہ الخوارج سوات گروپ میں شامل ہوئے۔

ملزمان عسکری تربیت یافتہ ہیں اور متعدد بار افغانستان جاچکے ہیں۔  ملزمان کراچی میں بھتہ وصولی، قتل و اقدام قتل کی متعدد کارروائیوں میں ملوث رہے ہیں۔

ملزمان زکریا عرف انعام اللہ ، رفیع اللہ عرف ٹیکسی والا اور عدنان ہزارے وال کے ساتھ مل کر جنرل ٹائر کمپنی کے صدر  سے 20 لاکھ  روپے، بنارس میں جنرل سٹور کے مالک  سے 10 لاکھ روپے، اسٹیل ٹاؤن میں ٹینکر والے  سے 10 لاکھ روپے، بنارس کے قریب فروٹ سپلائر  سے 3 لاکھ، پراپرٹی ڈیلر  سے 2 لاکھ ، بنارس میں جنرل اسٹور کے مالک  سے 15 لاکھ روپے بھتے  کی ڈیمانڈ کرچکے ہیں اور متعدد سے بھتہ وصول  بھی کیا ہے ۔

 تاجر عبد الغفار  سے 50 لاکھ روپے بھتے کی ڈیمانڈ کی اور جان سے مارنے کی دھمکیاں دیں۔

ملزم اکبر زیب  خان نے اپنے ساتھی زکریا عرف انعام اللہ کے ساتھ مل کر لانڈھی کے قریب مخبری کے شبہ میں ریٹائرڈ ہیڈ کانسٹیبل فضل زادہ کو قتل اور سید آفرین کو زخمی کیا۔