کراچی : وزیر اعلیٰ سندھ مراد علی شاہ نے وزیر اعظم محمد شہباز شریف سے کے فور منصوبے کیلئے 10 ارب روپے  کا مطالبہ کردیا۔

وزیر اعلیٰ نے وزیر اعظم کے نام خط لکھا جس میں بتایا گیا کہ کے بی فیڈر کی 38 میل تک سیمنٹ کنکریٹ سے لائیننگ کرنی ہے، لائیننگ سے 510 کیوسکس اضافی پانی کراچی کو مل سکے گا۔

خط کے متن کے مطابق منصوبہ پر 39 ارب 92 کروڑ روپے خرچ ہوں گے حکومت سندھ اور وفاقی حکومت پچاس پچاس فیصد رقم دیں گی، منصوبے کی منظوری ایکنک نے 19 جولائی 2022 کو دی تھی۔

وزیر اعلیٰ نے بتایا کہ گزشتہ مالی سال کے دوران صرف ایک ارب روپے جاری کیے گئے تھے حالانکہ 3 ارب روپے مختص کیے گئے تھے، رواں مالی سال میں پہلی سہ ماہی کی قسط کے طور پر 3 اکتوبر کو 15 کروڑ روپے جاری کیے گئے۔

خط میں کہا گیا کہ کے بی فیڈر وسیع پیمانہ پر زرعی مقاصد اور کراچی کو پینے کے لئے پانی فراہم کرتا ہے، منصوبہ کے فور سے منسلک ہے جس کو وفاقی حکومت واپڈا کے ذریعہ مکمل کرے گی، کے فور پر کام 50 فیصد مکمل ہوچکا ہے حکومت سندھ جون 2025 تک 70 فیصد رقم دے گی۔

مراد علی شاہ نے کہا کہ دسمبر سے لے کر جنوری تک کوٹڑی بیراج کی صفائی کے باعث کینال بند ہوتا ہے، کینال بند ہونے سے اس منصوبے پر تیزی سے کام مکمل کرایا جاسکتا ہے، وفاقی حکومت فوری طور پر 50 فیصد رقم کا انتظام کرے۔

وزیراعظم کو خط میں بتایا گیا کہ منصوبے پر تاخیر سے اس کی تکمیل اور اخراجات پر اثر پڑے گا، منصوبے کو بروقت مکمل کرنے کے لئے ہنگامی بنیادوں پر فنڈز فراہم کیے جائیں، رواں مالی سال کے دوران 10 ارب روپے جاری کیے جائیں۔

خط کے متن میں مزید کہا گیا کہ حکومت سندھ نے اضافی فنڈز مختص کردیے ہیں تاکہ منصوبے میں تاخیر نہ ہو، وفاقی حکومت سے درخواست ہے کہ اضافی فنڈز فراہم کرے، باقی ماندہ 85 کروڑ روپے جاری کیے جائیں اور 8 ارب روپے جلد دیے جائیں، کراچی پیکج سے 6 ارب روپے اور حیدرآباد پیکج سے 2 ارب روپے فراہم کر دیے ہیں تاکہ نصف رقم فراہم کی جاسکے۔