کراچی: امریکی سفیر ڈونلڈ بلوم کے دورہ کراچی کے موقع پر تجارت اور سرمایہ کاری کے تعلقات کو مضبوط بنانے پر زور دیا گیا ہے۔

امریکی سفیر ڈونلڈ بلوم نے 17 اور 18 دسمبر کو کراچی کا دورہ کیا، دورہ  کا مقصد پاکستان اور امریکہ کے درمیان کاروبار، تجارت، روزگار اور تعلیم کے شعبوں میں دو طرفہ تعلقات کو مزید مستحکم کرنا تھا۔

امریکی سفیر نے معاشی ترقی، مواقع کی فراہمی اور انسانی وقار کے احترام جیسے مشترکہ اہداف پر زور دیا۔

کاروباری رہنماؤں کے ساتھ ایک عشائیے میں سفیر ڈونلڈ بلوم نے تجارت اور سرمایہ کاری کو وسعت دینے کی اہمیت پر روشنی ڈالی اور پاکستانی تاجروں کو ’’اسیلیکٹ یو ایس اے 2025 انویسٹمنٹ سمٹ‘‘ میں شرکت کی دعوت دی۔

اس موقع پر انہوں نے کہا کہ امریکہ پاکستان کی معاشی ترقی کی حمایت کے لیے پرعزم ہے۔ ہماری مشترکہ خوشحالی آزاد، کھلے اور مسابقتی بازاروں پر منحصر ہے جہاں تجارت اور سرمایہ کاری فروغ پا سکیں۔

سندھ ہیومن رائٹس کمیشن میں انسانی حقوق کے کارکنوں سے ملاقات کے دوران ڈونلڈ بلوم نے پاکستان میں مذہبی آزادیوں اور شہری حقوق کے فروغ کے لیے امریکی حمایت کا اعادہ کیا۔

انہوں نے کہا کہ امریکہ پاکستان کے ساتھ کھڑا ہے تاکہ تمام شہریوں کے حقوق کا تحفظ یقینی بنایا جاسکے۔

علاوہ ازیں امریکی سفیر نے کلفٹن میں اربن فاریسٹ اور پاک امریکہ فرینڈشپ گارڈن کا بھی دورہ کیا، جہاں انہوں نے نیم اور مورنگا کے درخت لگائے۔ یہ باغ اور نئے درخت پاکستان اور امریکہ کے درمیان مضبوط شراکت داری اور ماحولیات کے لیے ہمارے مشترکہ عزم کی علامت ہیں۔

امریکی حمایت یافتہ پروگرام نیٹ ورک آف آرگنائزیشنز ورکنگ فار پیپل ود ڈس ایبلٹیز پاکستان کے دورے کے موقع پر امریکی سفیر نے کہا کہ تعلیم زندگیوں کو بدل دیتی ہے اور ہم ان تعلیمی اور پیشہ ورانہ پروگراموں کی حمایت پر فخر محسوس کرتے ہیں جو آزادی، وقار اور مساوات کو فروغ دیتے ہیں۔

امریکی سفیر نے وزیراعلیٰ سندھ مراد علی شاہ اور گورنر سندھ محمد کامران خان ٹیسوری سے بھی ملاقات کی جس میں تجارت، معاشی تعلقات اور امریکی سرمایہ کاری کے فروغ پر تبادلہ خیال کیا گیا۔

امریکی سفیر ڈونلڈ بلوم کا یہ دورہ پاکستان اور امریکہ کے درمیان جاری شراکت داری کو مزید مستحکم کرنے اور مشترکہ اہداف کے حصول کے لیے عزم کا اظہار تھا۔