پی آئی اے کے ترجمان عبداللہ حفیظ خان کا کہنا تھا کہ پی آئی اے کی 10 ارب روپے کی بولی کوئی سنجیدہ پیشکش نہیں تھی۔

پاکستان انٹرنیشنل ایئرلائنز (پی آئی اے) کی انتظامیہ نے واضح کیا ہے کہ ایئرلائن اب عالمی سطح پر اپنی معیاری خدمات اور آپریشنز کے ذریعے دنیا کی دیگر ایئرلائنسز سے مقابلہ کرنے کی بھرپور صلاحیت رکھتی ہے۔

پی آئی اے کے ترجمان عبداللہ حفیظ خان نے حالیہ گفتگو میں کہا کہ ایئرلائن کی خدمات پہلے کے مقابلے میں کہیں زیادہ معیار کی حامل ہیں اور مستقبل میں اسے عالمی مارکیٹ میں زیادہ بولیاں ملنی چاہئیں۔

عبداللہ حفیظ خان کا کہنا تھا کہ میرے خیال میں 10 ارب کی بولی کوئی سنجیدہ پیشکش نہیں تھی، اور پی آئی اے کو اس سے کہیں زیادہ بولی ملنی چاہیے۔

انہوں نے یہ بھی بتایا کہ پی آئی اے نے اس سال تقریباً 200 ارب روپے کی آمدنی حاصل کی ہے، جو ایئرلائن کے مستحکم مالی نتائج کی عکاسی کرتا ہے۔

انہوں نے مزید کہا کہ پی آئی اے کو غیر ملکی پروازوں کے لیے اجازت مل چکی ہے، اور مارچ سے مانچسٹر، برمنگھم اور لندن کے آپریشنز کا آغاز ہوگا۔

یورپی یونین کی جانب سے سخت آڈٹ کلیئر کرنے کے بعد پی آئی اے نے یورپ اور برطانیہ میں اپنے آپریشنز کی بحالی کی طرف اہم قدم اٹھایا ہے۔

“ترجمان کا کہنا تھا کہ یورپ کے لیے پہلی فلائٹ 10 جنوری کو روانہ ہوگی، اور اس کے بعد پی آئی اے کا آپریشن مزید وسعت پائے گا، ہم ایک محفوظ اور پروفیشنل فلائٹ آپریٹر ہیں۔