انٹرنیشنل کرکٹ کونسل ( آئی سی سی )  نے چیمپئنز ٹرافی 2025 کے حوالے سے  پاک بھارت فیوژن فارمولے  کی تصدیق کردی۔

تفصیلات کے مطابق آئی سی سی بورڈ نے پاک بھارت فیوژن فارمولے کی منظوری دے دی ہے جو چیمپئنز ٹرافی ، ویمنز ورلڈ کپ اور ٹی ٹوئنٹی ورلڈ کپ 2026 پر نافذالعمل  ہوگا۔

معاہدے کے تحت پاکستان میں چیمپئنز ٹرافی 2025 ، بھارت میں ویمنز ون ڈے ورلڈکپ 2025 اور بھارت، سری لنکا میں شیڈول ٹی ٹوئنٹی ورلڈکپ 2026 کے دوران بھی پاک بھارت میچز نیوٹرل مقام پر منعقد ہوں گے۔

آئی سی سی  کی جانب سے چیمپئنز ٹرافی 2025 کا شیڈول جلد جاری کردیا جائے گا۔

آئی سی سی  کے مطابق پاکستاں 4 سال بعد ایک اور آئی سی سی ایونٹ کی میزبانی کرے گا جس میں پاکستان کو 2028 کے ویمنز ٹی ٹوئنٹی ورلڈکپ کی میزبانی دی گئی ہے۔

2028 ویمنز ٹی ٹوئنٹی ورلڈکپ اگلے سائیکل کا پہلا آئی سی سی ایونٹ ہوگا اور ویمنز ٹی ٹوئنٹی ورلڈ کپ میں بھی پاکستان بھارت کا فیوژن فارمولا اپلائی ہوگا جبکہ پاک بھارت فیوژن فارمولا ناک آؤٹ میچز پر بھی اپلائی ہوگا۔

اس کے علاوہ 2027 تک دونوں ٹیمیں ایک دوسرے کے ملک میں آئی سی سی ایونٹ کا میچ نیوٹرل وینیو پر کھیلیں گی اور نیوٹرل وینیو کا انتخاب میزبان بورڈ کرے گا۔