سعودی عرب کے وزیر صحت نے اپنے جاری کردہ  بیان میں  واضح  کیا ہے کہ   مملکت میں آیندہ چند ہفتوں کے دوران میں کرونا وائرس کے کیسوں کی تعداد  2  لاکھ تک  پہنچ سکتی ہے۔

سعودی خبررساں ادار ے  کے مطابق وزیر صحت  نے  کہا ہے کہ ’اس میں کوئی شک نہیں کہ ہدایات اور طریق کار کی پاسداری کی وجہ سے کرونا وائرس کے کیسوں کی تعداد کو کم سے کم رکھنے میں مدد ملی ہے۔

جبکہ ان ہدایات پر عمل درآمد نہ کرنے کی صورت میں کیسوں کی تعداد میں بہت زیادہ اضافہ ہوسکتا ہے۔‘‘

سعودی وزارت صحت نے منگل کے روز کرونا وائرس کے 41 نئے کیسوں کی تصدیق کی ہے جس کے بعد اس مہلک وائرس کا شکار ہونےوالے افراد کی تعداد 2795 ہوگئی ہے۔

وزیر صحت نے بتایا کہ دوسرا مسئلہ یہ ہے کہ معاشرے کے بعض لوگ غیر ذمہ داری کا مظاہرہ کررہے ہیں۔ یہی وجہ ہے کہ متاثرین کی تعداد میں روز بروز اضافہ ہورہا ہے۔

سعودی حکومت نے اس مہلک وائرس کو پھیلنے سے روکنے کے لیے سوموار کو دارالحکومت الریاض سمیت متعدد شہروں میں 24 گھنٹے کا کرفیو نافذ کردیا ہے۔

خیال رہے  کہ خادم حرمین شریفین شاہ سلمان بن عبدالعزیز نے نئے کورونا وائرس کے خطرات سے نمٹنے کے لیے مزید 7 ارب ریال کی منظوری  دی ہے۔

اس سے قبل 8 ارب ریال کی منظوری کا شاہی فرمان جاری ہوا تھا مجموعی طور پر یہ رقم 15 ارب ریال ہوگئی- منظوری کی درخواست ولی عہد شہزادہ محمد بن سلمان نے کی تھی۔