اسلام آباد: پاکستان اور کینیا کے درمیان تجارتی تعلقات مزید مضبوط کرنے پر اتفاق کیا گیا ہے۔

وفاقی وزیر تجارت جام کمال خان نے کینیا کے ہائی کمشنر سے اہم ملاقات کی جس دوران تجارتی تعلقات مضبوط کرنے پر اتفاق کیا گیا ہے۔

اس دوران وزیر تجارت جام کمال خان نے کہا کہ پاکستان مشرقی افریقی ممالک اور وسطی ایشیائی ریاستوں کے درمیان تجارتی پل بن سکتا ہے جب کہ کینیا اور پاکستان کے درمیان زراعت، دوا سازی اور دیگر شعبوں میں تعاون کے امکانات ہیں۔

پاکستان کینیا سے چائے کا بڑا درآمد کنندہ ہے جب کہ پاکستان نے دیگر افریقی مصنوعات میں دلچسپی کا اظہار کیا اور کینیا کو ہمالیائی گلابی نمک، ماربل اور سیمنٹ کے مواقع سے فائدہ اٹھانے کی دعوت دی۔

پاکستان نے مشرقی افریقہ کے ساتھ آزاد تجارتی معاہدے کے لیے معاہدے پر کام تیز کرنے کی درخواست کی اور پاکستان میں مشرقی افریقی تجارت پر خصوصی کانفرنس کی بھی تجویز دی۔

علاوہ ازیں وزیر تجارت جام کمال نے سیالکوٹ اور گوجرانوالہ کے صنعتی دورے کی تجویز دی جس پر کینیا کے ہائی کمشنر نے پاکستان کے فعال کردار پر اظہار تحسین کیا۔

وزیر تجارت کہتے ہیں کہ وسطی ایشیا، مشرقی افریقہ اور پاکستان کو ایک پلیٹ فارم پر لانا ضروری  ہے، پاکستانی نجی کمپنیاں پاور سیکٹر میں کینیا کے لیے مواقع فراہم کرسکتی ہیں۔

کینیا کے میگا پروجیکٹس کے لیے سیمنٹ اور اسٹیل کی فراہمی پر گفتگو ہوئی، کینیا کے ہائی کمشنر نے کہا کہ آپ نے دروازہ کھول دیا اس سے پہلے کہ ہم دستک دیتے جب کہ پاکستان اور کینیا کے درمیان اقتصادی تعاون کو مزید وسعت دینے پر بھی اتفاق کیا گیا ہے۔