اسلام آباد: رواں مالی سال کے پہلے پانچ ماہ میں ترسیلات زر اور برآمدات سمیت درآمدات، بیرونی سرمایہ کاری، زرمبادلہ ذخائر اور روپے کی قدر میں بھی اضافہ ریکارڈ کیا گیا ہے۔

وزارت خزانہ نے ماہانہ معاشی آؤٹ لک جاری کردیا ہے جس کے مطابق رواں مالی سال کے پہلے پانچ ماہ میں ترسیلات زر اور برآمدات میں اضافہ ریکارڈ کیا گیا۔

علاوہ ازیں درآمدات، بیرونی سرمایہ کاری، زرمبادلہ ذخائر اور روپے کی قدر میں بھی اضافہ ہوا جب کہ گزشتہ مالی سال کے مقابلے میں رواں مالی سال ترسیلات زر میں 33.6 فیصد کا اضافہ ہوا اور پانچ ماہ میں ترسیلات زر 14.77 ارب ڈالر رہیں۔

رپورٹ کے مطابق جولائی تا نومبر برآمدات 7.4 فیصد اور درآمدات 8.3 فیصد بڑھیں، کل بیرونی سرمایہ کاری میں 42.2 فیصد کا اضافہ ہوا جب کہ مرکزی بینک کے مالی ذخائر 7.2 ارب ڈالر سے بڑھ کر 11.85 ڈالر تک پہنچ گئے۔

رپورٹ میں بتایا گیا ہے کہ چار ماہ میں ایف بی آر محصولات میں 23.2 فیصد کا اضافہ ہوا، نان ٹیکس آمدنی میں 101.3 فیصد کا اضافہ ریکارڈ کیا گیا جب کہ چار ماہ میں مالی خسارہ 495 ارب  روپے سرپلس رہا۔

رپورٹ میں مزید بتایا گیا ہے کہ زرعی شعبے کو قرضوں میں 8.5 فیصد کا اضافہ ریکارڈ کیا گیا، جولائی تا نومبر افراط زر کی شرح 29.2 فیصد سے کم ہوکر 4.9 فیصد پر آگئی جب کہ بڑی صنعتوں کی پیداوار میں پانچ ماہ میں 0.02 فیصد کا اضافہ ہوا۔