سینچورین ٹیسٹ کے دوسرے دن خراب روشنی کے باعث میچ قبل از وقت ختم کر دیا گیا، پاکستان نے اپنی دوسری اننگ میں 3 وکٹوں کے نقصان پر 88 رنز بنا لیے ہیں۔

جنوبی افریقا اور پاکستان کے درمیان ٹیسٹ سیریز کے پہلے میچ کے دوسرے دن پروٹیز نے 3 وکٹوں پر 82 رنز سے اپنی اننگ کا آغاز کیا۔

دوسرے دن کی پہلی وکٹ 48 رنز کے اضافے کے بعد ملی جب ٹمبا بووما 31 رنز بنا آؤٹ ہوئے، جبکہ 178 کے مجموعی اسکور پر ڈیوڈ بیٹنگھم اور 188 رنز پر کائل ویرین پویلین واپس لوٹ گئے۔

ایڈن مارکرم 89، مارکو جنسن 2، کاگیسو رباڈا 13 اور ڈین پیٹرسن نے 12 رنز بنائے جبکہ کوربن بوش 81 رنز پر ناٹ آؤٹ رہے۔

جنوبی افریقہ کی پوری ٹیم 301 رنز بنا کر آؤٹ ہوئی اور پاکستان کے خلاف 90 رنز کی برتری حاصل کی۔

پاکستان کی جانب سے خرم شہزاد اور نسیم شاہ نے 3۔3 کھلاڑیوں کو آؤٹ کیا، عامر جمال کے حصے میں 2 وکٹیں آئیں جبکہ محمد عباس اور صائم ایوب نے ایک ایک وکٹ حاصل کی۔

90 رنز کے خسارے پر پاکستان نے اپنی دوسری اننگ کا آغاز کیا، اور کھیل کے اختتام تک 3 وکٹوں کے نقصان پر 88 رنز بنا لیے جبکہ پروٹیز کا خسارہ ختم کرنے کے لیے 2 رنز مزید درکار ہیں۔

پاکستان کے صائم ایوب 28، کپتان شان مسعود 28 اور کامران غلام 4 رنز بنا کر پویلین لوٹ چکے ہیں جبکہ بابر اعظم 16 اور نائب کپتان سعود شکیل 8 رنز کے ساتھ کریز پر موجود ہیں۔

پروٹیز کے بالر مارکو جینسننے 2 اور رباڈا نے 1 کھلاڑی کا شکار کیا۔