پاکستان مسلم لیگ ن کے رہنما کھیل داس نے حیدرآباد میں ایک پریس کانفرنس کے دوران کہا کہ نواز شریف نے ملک کی خاطر سخت فیصلے کیے اور سیاست کو قربان کیا۔

انہوں نے مزید کہا کہ نواز شریف کو اس وقت مشکل فیصلے لینے پڑے جب پاکستان کو ایشین ہیرو بنانے کی کوشش کی جا رہی تھی، اور اسی دوران ان کے خلاف سازش کی گئی۔

کھیل داس نے اس بات پر زور دیا کہ مذاکرات سے کسی کی سزا ختم نہیں ہو سکتی، لیکن ہم بات چیت اس لیے کرنا چاہتے ہیں تاکہ ملک میں انتشار کا خاتمہ ہو اور معاملات بہتر ہوں۔

وزیرِ اعظم کی جانب سے بجلی کی قیمتوں میں کمی کے لیے کی جانے والی کوششوں کی حمایت کرتے ہوئے کہا کہ حکومت جلد ہی عوام کے لیے خوشخبری دے گی۔

رہنما مسلم لیگ ن نے آرمی چیف کی حکومت کے ساتھ مل کر ملک کی ترقی کی سمت میں اقدامات کو سراہتے ہوئے کہا کہ پاکستان کو ترقی کی راہ پر گامزن کرنے کے لیے فوج اور حکومت کا اتحاد اہم ہے۔

کھیل داس نے اس بات کا بھی ذکر کیا کہ کچھ جماعتیں آج بھی ملک میں سول نافرمانی کی بات کر رہی ہیں، لیکن اب آخری احتجاج کا وقت گزر چکا ہے۔

انہوں نے کہا کہ پاکستان میں کسی بھی ملک دشمن سیاست کو رد کیا جا چکا ہے، اور یہ بات واضح ہے کہ دنیا بھر میں فوجی تنصیبات پر حملے کو برداشت نہیں کیا جاتا۔ فوجی تنصیبات پر حملہ کرنے والوں کو آرمی عدالت سے سزا دینا درست فیصلہ ہے۔

کھیل داس نے سابق صدر عارف علوی کو تنقید کا نشانہ بناتے ہوئے کہا کہ وہ دہشت گردوں کی رہائی میں ملوث ہیں۔ انہوں نے ملک کی سالمیت اور دفاع کے تحفظ کے لیے حکومتی اقدامات کی حمایت کی۔