وزیراعظم نے کہا ہے کہ دہشتگردی نے دوبارہ سراٹھایا ہے اس کا سرکچلےبغیرآگے نہیں بڑھ سکتے، دہشتگردی کے خاتمے کیلئے افسر اور جوان قربانیاں دے رہے ہیں۔ 

وزیراعظم شہبازشریف نے خصوصی سرمایہ کاری سہولت کونسل اجلاس میں اظہارخیال کرتے ہوئے کہا ہے کہ ملک میں مکمل امن ضروری ہے، دہشتگردی نے دوبارہ سراٹھایا ہے اس کا سرکچلےبغیرآگے نہیں بڑھ سکتے، دہشتگردی کے خاتمے کیلئے افسراورجوان قربانیاں دے رہے ہیں۔

وزیراعظم نے کہا کہ دہشتگردی کا ہرروزکوئی نہ کوئی واقعہ ہوتا ہے جس میں جوان شہید ہورہے ہیں، سب کو متحد ہوکردہشتگردی کاخاتمہ کرنا ہوگا، پاراچنارمسئلے پرمعاہدہ ہوا جس پرسب کو مبارکباد دیتا ہوں، پاراچنارواقعے میں سیکٹروں لوگوں کے جاں بحق ہونے پرافسوس ہے، امن وامان کی صورتحال کو یقینی بنانےکیلئےٹھوس اقدامات کررہےہیں۔

انھوں نے کہا کہ 2025پاکستان کی معاشی ترقی کی نوید ہے، سال2025 پاکستان کی معاشی ترقی کاسال ثابت ہوگا، حکومت نےتمام چیلنجزکامقابلہ کیا، 2018کے بعد پہلی بارمہنگائی 4.1 فیصدکی کم ترین سطح پرآگئی، ترسیلات زرمیں 5 ماہ میں34 فیصد اضافہ ہوا ہے، چاول کی ایکسپورٹ سے قومی خزانےمیں4ارب ڈالرآئے، زرمبادلہ کےذخائرآج ساڑھے12ارب ڈالرپرآگئےہیں۔

وزیراعظم شہبازشریف نے کہا کہ چینی سرپلس تھی اس لیے ہم ایکسپورٹ کرپائے، اسمگلنگ جاری رہتی توچینی ایکسپورٹ نہ ہوپاتی، چینی کی اسمگلنگ کی روک تھام کیلئےبھرپورایکشن ہوا، چینی کی ایکسپورٹ کے ذریعے بھی 50 کروڑڈالرقومی خزانےمیں آرہےہیں۔

انھوں نے کہا کہ پالیسی ریٹ کم کرنے کیلئے اسٹیٹ بینک کے پاس گنجائش موجودہے، نئی حکومت کوساڑھے 9 ماہ بیرونی اوراندرونی خلفشار کا سامنا کرناپڑا، تمام ارکان نے گزشتہ سال ملک میں معاشی استحکام کیلئےاہم کرداراداکیا، شبانہ روزکام کرینگے توپاکستان اقوام عالم میں ضرور سر اٹھا کرچلےگا۔

وزیراعظم شہبازشریف نے ایس آئی ایف سی اجلاس کے شرکا کو نئے سال کی مبارکباد بھی دی۔