وزیراطلاعات پنجاب عظمیٰ بخاری نے کہا کہ جو عوام کے ووٹ سے اقتدار میں آتے انہی کو عوام کی فکر ہوتی ہے، جو چور دروازوں سے اقتدار پر قابض ہوتے وہ قوم کے بچوں کے ہاتھ پیٹرول بم اور غلیلیں کی تھماتے ہیں۔

وزیراطلاعات پنجاب عظمیٰ بخاری نے اپنے ایک بیان میں کہا کہ وزیراعلیٰ پنجاب مریم نواز قوم کے بچوں کو الیکٹرک بائیکس کے بعد سکالرشپ دے رہی ہیں، مریم نواز طلبہ و طالبات کے ساتھ لاکھوں والدین سے دعائیں وصول کررہی ہیں۔

عظمیٰ بخاری نے کہا کہ مریم نواز کی کارکردگی سے جو مقابلہ نہیں کرسکتے وہ غلاظت کے ڈھیر ان پر کیچڑ اچھالنے میں لگے، مریم نواز کےخلاف 2014 سے گھٹیا مہم چل رہی لیکن وہ ہر گزرتے دن سے مقبول اور طاقتور ہورہی ہیں۔

انہوں نے یہ بھی کہا کہ ایک شیطانی سوچ والے شخص اور مخصوص جماعت نے نوجوانوں کی برین واشنگ کی،9 مئی اور 26 نومبر کی ناکام بغاوتیں نوجوانوں کی برین واشنگ کا نتیجہ ہیں۔

ان کا یہ بھی کہنا تھا کہ نوجوانوں کو خود فیصلہ کرنا ہے ان کو اپنا روشن مستقبل چاہیے یا شیطانی سوچ والے شخص کی اقتدار کی ہوس کا ایندھن بننا ہے۔

عظمیٰ بخاری نے مزید یہ بھی کہا کہ جو اقتدار کی کرسی پر بیٹھ کر شاہی حکم کو حرف آخر قرار دیتے تھے آج ان کو آئین اور قانون کی باتیں کرتے شرم آنی چاہیے، ملک کے خلاف سازشیں کرنے والوں کو معافیاں اور این آر او نہیں ملتے۔