بھمبر: وزیر اعظم شہباز شریف نے بھمبر آزاد جموں و کشمیر میں دانش اسکول کا سنگ بنیاد رکھتے ہوئے کہا کہ دانش اسکول کا قیام خوش آئند ہے، اگر یہ اسکول نہ ہوتے تو ہونہار بچے و بچیاں دھول میں گم ہوجاتے۔

وزیراعظم محمد شہباز شریف نے دانش اسکول، بھمبر آزاد جموں و کشمیر کے سنگ بنیاد رکھنے کی تقریب میں شرکت کی جس دوران انہوں نے تقریب سے بھی خطاب کیا۔

وزیر اعظم کا خطاب

وزیر اعظم نے تقریب سے خطاب کرتے ہوئے کہا کہ آج میرے لیے انتہائی خوشی کا مقام ہے کیونکہ آج آزاد کشمیر میں دانش اسکول کا قیام عمل میں لایا جارہا ہے۔

ان کا کہنا تھا کہ دانش اسکولز کی بنیاد نوازشریف کی زیرقیادت رکھی گئی، ذہین اور ہونہار بچوں کی تعلیم میں وسائل کی قلت حائل ہوتی ہے۔ دانش اسکول نہ ہوتے تو ہونہار بچے و بچیاں دھول میں گم ہوجاتے، آزاد کشمیر میں دانش اسکول کا قیام خوش آئند ہے۔

وزیراعظم شہباز شریف کا خطاب کرتے ہوئے کہنا تھا کہ دور دراز علاقوں میں تعلیمی وسائل کی کمی ہے، غریب آدمی تعلیم کے مہنگے اخراجات برداشت نہیں کرسکتا جب کہ دانش اسکولوں میں تمام بچوں کو اعلیٰ تعلیم دی جارہی ہے۔

وزیراعظم نے اعلان کیا کہ دانش اسکول کےتمام اخراجات وفاقی حکومت برداشت کرے گی، گلگت بلتستان میں بھی دانش اسکول بنا رہے ہیں۔

شہباز شریف کہتے ہیں کہ مقبوضہ کشمیر کے عوام آزادی کی جنگ لڑ رہے ہیں جب کہ مقبوضہ کشمیر کی وادی خون سے سرخ ہوچکی ہے۔ مسئلہ کشمیر یو این قراردادوں کے مطابق حل ہونا چاہیے۔

انہوں نے مزید کہا کہ مقبوضہ کشمیر کے مظلوم عوام کے شانہ بشانہ کھڑے ہیں، مقبوضہ کشمیر کے عوام کی اخلاقی مدد کرتے رہیں گے جب کہ مقبوضہ کشمیر کے عوام آزادی کی جنگ لڑ رہے ہیں۔

خالد مقبول کا خطاب

اس سے قبل وفاقی وزیر تعلیم خالد مقبول صدیقی نے بھی تقریب سے خطاب کیا جس دوران ان کا کہنا تھا کہ کشمیر میں علم کے ساتھ دانش کا بھی اہتمام کرنے آئے ہیں، آزاد کشمیر میں دانش اسکول کی بنیاد رکھ دی ہے۔

وفاقی وزیر تعلیم کہتے ہیں کہ دانش اسکول تعلیم اور تربیت کا بہترین ادارہ ثابت ہوگا، دانش اسکول کشمیر کاز کے لیے بھی فائدہ مند ہوگا جب کہ دانش اسکول میں جدید تعلیم کے تمام تقاضے پورے کیے جائیں گے۔

وزیراعظم آزاد کشمیر کا خطاب

وزیراعظم آزاد کشمیر چوہدری انوار الحق نے تقریب سے خطاب کرتے ہوئے کہا کہ آزاد کشمیرکی ترقی میں وزیراعظم خصوصی دلچسپی لے رہے ہیں جب کہ آزاد کشمیر کے لیے حکومت ہر ممکن فنڈز کی فراہمی یقینی بنارہی ہے۔

چوہدری انوار الحق کا کہنا تھا کہ وزیراعظم کی کوششوں سے بجلی کے منصوبوں پر کام جاری ہے، مودی جو کچھ مرضی کرلے کشمیر اور پاکستان کا رشتہ کمزور نہیں ہوسکتا۔ آزاد کشمیر کا شمار دنیا کے بہترین خطوں میں ہوتا ہے جب کہ وفاقی حکومت بجلی اور سستے آٹے کی فراہمی یقینی بنارہی ہے۔

وزیراعظم آزاد کشمیر نے اعلان کیا کہ آزاد کشمیر کے تمام وسائل تحریک آزادی کشمیر کے لیے وقف ہیں، تحریک آزادی میں ہمارے آباؤ اجداد کا خون شامل ہے۔ تحریک آزادی کشمیر پر کبھی بھی سمجھوتہ نہیں ہوسکتا۔

دانش اسکول پر بات کرتے ہوئے انہوں نے کہا کہ دانش اسکول کا قیام وزیراعظم کی مدبرانہ سوچ کا نتیجہ ہے، دشمن ہمیں تقسیم کرنے کی کسی سازش میں کامیاب نہیں ہوگا جب کہ دانش اسکول جیسے منصوبے گیم چینجر ثابت ہوں گے۔

ان کا مزید کہنا تھا کہ مودی نے مقبوضہ کشمیر میں شہریوں کی زندگی اجیرن بنارکھی ہے، بلا تفریق عوام کی خدمت کرنا اسلام کا پیغام ہے۔