وفاقی وزیر داخلہ محسن نقوی نے کہا کہ امریکہ میں چین مخالف گروپ سے ملاقات اور پروگرام میں شرکت کی خبر میں کوئی حقیقت نہیں ہے بلکہ یہ ایک منفی پروپیگنڈہ تھا۔

وفاقی وزیر داخلہ اور پاکستان کرکٹ بورڈ کے سربراہ محسن نقوی نے ممتازڈیموکریٹک رہنما طاہر جاوید سے ان کی رہائش گاہ پر ملاقات کے بعد میڈیا سے گفتگو کرتے ہوئے کہا کہ امریکہ کے دورہ کا مقصد پاکستان کے نقطہ نظر اور حقیقی صورتحال سے امریکہ کے منتخب اراکین کو آگاہی فراہم کرنا تھا۔

 محسن نقوی نے کہا کہ پاکستان کے ریاستی معملات اور حکومت کے حوالے سے امریکہ میں بہت گند پھیلایا جارہا تھا اور امریکی منتخب اراکین کے ذہنوں میں زہر پھیلایا جا رہا تھا، واشنگٹن میں امریکی منتخب اراکین سے ملاقاتیں بہت سود مند رہیں اور انہیں منفی پروپیگنڈے کا ادراک ہوا۔

وفاقی وزیر داخلہ کا یہ بھی کہنا تھا امریکی منتخب اراکین کے ذہنوں میں زہر بھرنا میری نظر میں ملک دشمنی ہے، آپ سیاست کریں آپ کا حق ہے سیاست کرنا، لیکن اس حد تک نہ جائیں کے جس سے پاکستان کا نقصان ہو۔

 محسن نقوی نے کہا کہ امریکی منتخب اراکین کی جانب سے مثبت رسپانس ملا ہے اور انشااللہ آنے والے وقت میں مزید مثبت صورتحال نظر آئے گی۔

انہوں نے کہا کہ منتخب اراکین سے میری ملاقات کے بعد ٹوئٹس کرائے گئے لیکن جن اراکین کانگریس کے ٹوئٹس سامنے آئے ان کی جانچ پڑتال کرلیں کہ ان کو اسرائیل کی فنڈنگ کتنی ہے، امریکی منتخب اراکین بہت سمجھدار ہیں اور وہ پاکستان کے اندرونی معاملات میں مداخلت نہیں چاہتے ہیں۔

محسن نقوی کا یہ بھی کہنا تھا کہ قومی کرکٹ اسٹار صائم ایوب پاکستان کا اثاثہ ہیں ان کے کیس کو خود مانیٹر کررہا ہوں، صائم ایوب سے روزانہ رابطے میں ہوں ان کا علاج چل رہا ہے آئندہ ایک دو دن میں ان کا پلاستر اتر جائے گا۔

پاکستان کرکٹ بورڈ کے سربراہ نے کہا کہ صائم ایوب کو وقت لگے گا میں چیمپئن ٹرافی کی وجہ سے صائم ایوب کا مستقبل داؤ پر نہیں لگانا چاہتا، میں خود ایک ایک چیز کو مانیٹر کر رہاہوں کیونکہ وہ ہمارا اثاثہ ہے۔