ہیوسٹن: وفاقی وزیرداخلہ محسن نقوی نے کہا ہے کہ پاکستان اور امریکہ کے درمیان تعلقات میں گرمجوشی آرہی ہے۔

وزیرداخلہ محسن نقوی کی امریکی کانگریس اور کانگریس کی فنانس کمیٹی کے اہم ممبر  الیگزینڈر گرین سے ملاقات ہوئی جس میں باہمی دلچسپی کے امور، پاک امریکہ تعلقات کے فروغ کے حوالے سے تبادلہ خیال کیا گیا۔

وفاقی وزیر محسن نقوی نے کانگریس مین الیگزینڈر گرین کو افغانستان سے ہونے والی دہشتگردی اور دراندازی کے واقعات کی تفصیلات سے آگاہ کیا اور پاکستان میں آنے والے زلزلے اور سیلاب میں متاثرین کی بھرپور مدد پر کانگریس مین الیگزینڈر گرین کا شکریہ ادا کیا۔

وزیر داخلہ نے امریکی کانگریس مین الیگزینڈر گرین کے  فلسطین ایشو پر اصولی مؤقف کو بھرپور سراہا اور کہا کہ امریکی کانگریس مین الیگزینڈر گرین نے فلسطین کے لئے توانا آواز بلند کی جو قابل ستائش ہے، امریکی کانگریس مین الیگزینڈر گرین کی جانب سے فلسطین پر ایسے اصولی مؤقف کو بہت پذیرائی ملی ہے۔

انہوں نے مزید کہا کہ پاکستان اور امریکہ کے درمیان تعلقات میں گرمجوشی آرہی ہے، آنے والے دنوں میں پاک امریکہ تعلقات مزید مستحکم ہوں گے۔

دوسری جانب کانگریس مین الیگزینڈر گرین کا کہنا تھا کہ جلد پاکستان کا دوبارہ دورہ کروں گا، زلزلے اور سیلاب میں پاکستانی عوام سے یکجہتی و مدد کے لئے 4 بار پاکستان آچکا ہوں۔

واضح رہے کہ ہیوسٹن میں پاکستان کے قونصل جنرل محمد آفتاب چوہدری اور پاکستانی نژاد معروف امریکی بزنس مین طاہر جاوید بھی اس موقع پر موجود تھے۔