پیپلزپارٹی کے مرکزی رہنما خورشید احمد شاہ نے سکھر میں میڈیا سے گفتگو کرتے ہوئے ناراکینال کی تعمیرو توسیع کے منصوبے پر تفصیل سے بات کی۔

ان کا کہنا تھا کہ ناراکینال کی تعمیروتوسیع کے بعد ریگستانی علاقوں تک پانی کی فراہمی ممکن ہو گی، جس سے کسانوں کو مزید فائدہ پہنچے گا۔

انہوں نے یہ بھی کہا کہ کینال کی مرمتی کے کام سے نہ صرف اس کی مضبوطی میں اضافہ ہوگا بلکہ کاشتکاروں کی زرعی پیداوار میں بھی بہتری آئے گی۔

خورشید شاہ نے پانی کے مسئلے کو انتہائی حساس قرار دیتے ہوئے کہا کہ پانی کے حصول کے دوران اتنا شدید تنازعہ ہوتا ہے کہ باپ بیٹے کی لڑائیاں اور بھائی بھائی کے درمیان برداشت کی کمی ہو جاتی ہے۔

انہوں نے مزید کہا کہ جب نواز شریف نے کالاباغ ڈیم کا ذکر کیا تھا، تو سندھ کے عوام سڑکوں پر نکل آئے تھے۔

سکھر میں گفتگو کے دوران انہوں نے سیاسی امور پر بھی اپنی رائے دی اور کہا کہ بینظیر بھٹو نے اباڑو میں دھرنا دیا اور سیاسی عمل کے ذریعے قوم پرستی کی سیاست کو ختم کیا۔ آج پھر لسانی سیاست کی کوشش کی جا رہی ہے، لیکن میں اب بھی یہ کہتا ہوں کہ ریاست کو چیلنج نہ کیا جائے۔

خورشید احمد شاہ نے سندھ کارڈ کے حوالے سے بھی اپنے خیالات کا اظہار کرتے ہوئے کہا کہ کوئی بھی پارٹی سندھ کارڈ نہیں کھیلے۔

ان کا کہنا تھا کہ مذاکرات کے دوران نئے مسائل سامنے آنا ایک معمولی بات ہے، اور پیپلزپارٹی ہمیشہ مذاکرات کے حق میں رہی ہے۔ انہوں نے کہا کہ اب بھی میں کہتا ہوں کہ حکومت اور پی ٹی آئی کے درمیان مذاکرات ہونے چاہئیں۔

آخر میں انہوں نے امریکی سیاستدان ڈونلڈ ٹرمپ کے بارے میں کہا کہ ڈونلڈ ٹرمپ کا پاکستانی سیاست سے کوئی تعلق نہیں ہے۔”