آئی ایس پی آر نے کہا ہے کہ شمالی وزیرستان میں سیکیورٹی فورسز نے انٹیلیجنس بیسڈ آپریشن کیا ہے جس کے نتیجے میں 6 خارجی دہشت گرد جہنم واصل ہوگئے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق 29 اور 30 جنوری کی درمیانی شب سیکیورٹی فورسز نے شمالی وزیرستان کے علاقے میر علی میں خارجی دہشت گردوں کی موجودگی کی اطلاع پر کارروائی کی۔

آئی ایس پی آر نے بتایا کہ سیکیورٹی فورسز کی موثر کارروائی کے نتیجے میں 6 خارجی دہشت گرد جہنم واصل ہوگئے، دہشت گردوں سے جھڑپ کے دوران میجر حمزہ اسرار اور سپاہی محمد نعیم شہید ہوئے۔

آئی ایس پی آر کا کہنا ہے کہ 29 سالہ میجر حمزہ اسرار کا تعلق راولپنڈی سے تھا، میجر حمزہ اسرار نے اپنے جوانوں کے دستے کی قیادت کرتے ہوئے جامِ شہادت نوش کیا۔

سپاہی محمد نعیم شہید کی عمر 26 برس اور تعلق ضلع نصیر آباد سے تھا، دونوں شہداء نے دہشت گردوں کے خلاف بے جگری سے لڑتے ہوئے جان کا عظیم نذرانہ پیش کیا۔

آئی ایس پی آر نے بتایا کہ علاقے کو خارجی دہشت گردوں اور ان کے سہولت کاروں سے پاک کرنے کے لیے سینیٹائزیشن آپریشن جاری ہے، پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پُرعزم ہیں، بہادر شہداء کی عظیم قربانیاں دہشت گردی کے خلاف ہمارے عزم کو تقویت دیتی ہیں۔

اضافی معلومات

میجر حمزہ اسرار شہید کی عمر 29 سال تھی۔

میجر حمزہ اسرار شہید کا تعلق ضلع راولپنڈی سے ہے۔

میجر حمزہ اسرار شہید نے 9 سال تک دفاع وطن کا فریضہ سرانجام دیا۔

میجر حمزہ اسرار شہید کی حال ہی میں شادی ہوئی تھی۔

میجر حمزہ اسرار شہید نے سوگواران میں اہلیہ، والدین اور بہن بھائی چھوڑے۔

26 سالہ سپاہی محمد نعیم شہید ضلع نصیر آباد کے رہائشی ہیں۔

سپاہی محمد نعیم شہید نے6 سال پاک فوج میں رہتے ہوئے وطن کا دفاع کیا۔

سپاہی محمد نعیم شہید نے سوگواران میں والدین چھوڑے۔