ترجمان ایم کیو ایم نے کہا کہ کراچی میں غیرقانونی تعمیرات، ٹینکر مافیا، جعلی ادویات، گھوسٹ بسیں اور صوبے میں بڑھتی مہنگائی پیپلز پارٹی کا کارنامہ ہے۔

ایم کیو ایم کے ترجمان کا کہنا ہے کہ پیپلز پارٹی کے نومولود ترجمانوں کی فوج ظفر موج کے بیانات بتا رہے ہیں کہ تیر نشانے پر لگا ہے، ایم کیو ایم نے ابھی صرف پیپلز پارٹی کی کرپشن کا ذکر کیا ہے تو سارے ترجمان چیخ اُٹھے۔

ایم کیو ایم کے ترجمان نے یہ بھی کہا کہ پیپلز پارٹی کے رہنماؤں نے کرپشن میں پی ایچ ڈی کی ہے اور کرپشن کو صنعت کا درجہ دیا ہے، پیپلز پارٹی نہ کراچی کے ٹیکس کا پیسہ چھوڑتی ہے اور نہ کرپشن کا کوئی موقع ہاتھ سے جانے دیتی ہے۔

ترجمان کا یہ بھی کہنا تھا کہ ایس بی سی اے، واٹر اینڈ سیوریج کارپوریشن کی اربوں روپے کی کرپشن سے سندھ کے حکمرانوں کے گھر چلتے ہیں، کراچی کے نوجوانوں کی نوکریاں ہڑپ کرنا، بوگس امتحانی نتائج کے ذریعے تعلیمی دروازے بند کرنا پیپلز پارٹی کا کریڈٹ ہے۔

ایم کیو ایم کے ترجمان نے کہا کہ کراچی میں روزانہ ڈکیتی میں  نوجوان مر رہے ہیں، سانگھڑ میں مائیں اپنے بچوں کے لاشیں سڑکوں پر لئے بیٹھی ہیں۔

ترجمان کا یہ بھی کہنا تھا کہ سندھ حکومت کی ماتحت پولیس کی بھتہ خوری سے تنگ چینی کمپنیوں کا کورٹس سے رجوع کرنا نوشتہ دیوار ہے، پیپلز پارٹی نے امن و امان، انفراسٹرکچر، تعلیم، صحت کا نظام تباہ و برباد کردیا ہے۔

ایم کیو ایم کے ترجمان نے کہا کہ ابھی تو شروعات ہوئی ہے ایم کیو ایم سندھ حکومت کی کرپشن کا پردہ چاک کرتی رہے گی، کراچی کے ٹیکس پر پلنے والی سندھ حکومت کے وزرا اور نومولود ترجمان اپنی پیٹیاں کس لیں۔