اسلام آباد: دہشت گردوں کے خلاف کامیاب کارروائی پر صدر اور وزیر اعظم نے سیکیورٹی فورسز کو خراج تحسین پیش کیا ہے۔

آئی ایس پی آر کے مطابق سیکیورٹی فورسز نے 30 اور 31 جنوری کو خیبرپختونخوا کے مختلف علاقوں میں کارروائیاں کے دوران 10 خارجی دہشت گردوں کو جہنم واصل کردیا۔

دہشت گردوں کے خلاف کامیاب کارروائی پر صدر مملکت آصف علی زرداری اور وزیر اعظم شہباز شریف نے سیکیورٹی فورسز کو خراج تحسین پیش کیا ہے۔

صدر مملکت کا خراج تحسین

صدر مملکت آصف علی زرداری نے سیکیورٹی فورسز کو خراج تحسین پیش کرتے ہوئے 10 خوارج کو جہنم واصل کرنے پر ان کی بہادری کو سراہا۔

صدر مملکت نے کامیاب کارروائیوں کے دوران ملک سے فتنتہ الخوارج کے مکمل خاتمے کے عزم کا اعادہ کرتے ہوئے کہا کہ سیکیورٹی فورسز دہشت گردی کے عفریت کے خاتمے کے لیے کاروائیاں کر رہی ہیں۔

آصف علی زرداری نے کہا کہ پوری قوم دہشت گردی کے خلاف متحد ہے اور دہشت گردی کے مکمل خاتمے تک فتنتہ الخوارج کے خلاف کارروائیاں جاری رہیں گی۔

وزیر اعظم کی جانب سے سیکیورٹی فورسز کی ستائش

وزیراعظم محمد شہباز شریف کی کولاچی، ضلع ڈیرہ اسماعیل خان اور ضلع وزیرستان میں فتنتہ الخوارج کے دہشت گردوں کے خلاف مختلف کامیاب کارروائی پر سیکیورٹی فورسز کی ستائش کی۔

وزیراعظم نے ان آپریشنز میں 10 خوارجی دہشت گردوں کو ہلاک کرنے پر سیکیورٹی فورسز کو خراج تحسین پیش کیا۔

شہباز شریف کا کہنا تھا کہ پوری قوم دہشت گردوں کے خلاف جنگ میں سیکیورٹی فورسز کے ساتھ کھڑی ہے، ملک سے ہر قسم کی دہشت گردی کے خاتمے کے لئے پرعزم ہیں۔