وزیر منصوبہ بندی احسن اقبال نے آکسفورڈ یونین میں ہونے والے ایک اہم مقابلے میں شاندار کامیابی حاصل کی۔

احسن اقبال نے لبرل جمہوریت کی ناکامی پر مدلل موقف پیش کرتے ہوئے 180 کے مقابلے میں 145 ووٹ حاصل کئے۔ اس موقع پر انہوں نے ترقی پذیر ممالک کے حقوق اور عالمی انصاف پر تفصیل سے بات کی۔

وزیر منصوبہ بندی کو آکسفورڈ یونین کے صدر اسرار کاکڑ کی دعوت پر اس مقابلے میں شرکت کا موقع ملا۔ احسن اقبال نے اپنے خطاب میں لبرل جمہوریت، آزادی، مساوات اور ترقی کے حوالے سے اپنے خیالات کا اظہار کیا، اور عالمی دنیا میں موجود ناانصافیوں، غربت، سیاسی عدم استحکام اور معاشی بدحالی کے عوامل کو اجاگر کیا۔

انہوں نے اپنے خطاب میں مقبوضہ کشمیر اور فلسطین میں انسانی حقوق کی خلاف ورزیوں کا ذکر کیا اور کہا کہ انسانی حقوق کے چیمپئین بننے والی طاقتیں ان معاملات پر خاموش تماشائی بنی ہوئی ہیں۔

احسن اقبال نے مزید کہا کہ دنیا کے ترقی یافتہ ممالک 80 فیصد کاربن اخراج کے ذمہ دار ہیں، اور ان ممالک کا کاربن اخراج کے اثرات سے غریب ممالک سب سے زیادہ متاثر ہو رہے ہیں۔

پاکستان میں 2022 کے سیلاب میں 30 ارب ڈالر کا نقصان ہوا، لیکن احسن اقبال نے افسوس کا اظہار کیا کہ عالمی برادری نے پاکستان کی مدد کرنے کی بجائے قرضوں کو دوبارہ ترتیب دیا۔

انہوں نے کہا کہ پاکستان کا کاربن اخراج میں حصہ 1 فیصد سے بھی کم ہے، اور اس کے باوجود پاکستان کو عالمی برادری کی جانب سے حمایت کی کمی کا سامنا ہے۔