یوم یکجہتی کشمیر کے موقع پر عسکری قیادت اور افواج پاکستان نے مقبوضہ جموں و کشمیر کے بہادر عوام کے حقِ خودارادیت کی منصفانہ جدوجہد میں ان کی غیر متزلزل حمایت کا اعادہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی، تینوں مسلح افواج کے سربراہان اور پاکستانی فوج نے کشمیری عوام کے حوصلے اور عزم کو خراجِ تحسین پیش کیا۔

ترجمان آئی ایس پی آر کے مطابق افواج پاکستان نے کہا کہ کشمیری عوام نے دہائیوں سے جاری جبر، ریاستی سرپرستی میں بربریت اور سنگین انسانی حقوق کی خلاف ورزیوں کو برداشت کیا ہے۔ ان کا غیر متزلزل عزم پوری قوم کے لیے ہمت اور حوصلے کی علامت ہے۔

پاکستان کی مسلح افواج سنگین انسانی حقوق کی خلاف ورزیوں، بشمول ماورائے عدالت قتل، جبری گمشدگیوں اور بلاجواز گرفتاریوں کی شدید مذمت کرتی ہیں۔

آئی ایس پی آر نے کہا کہ بھارت کی یہ مظالم بین الاقوامی قوانین، انسانی اصولوں اور بنیادی انسانی حقوق کی صریح خلاف ورزی ہیں۔

پاکستان عالمی برادری، بین الاقوامی انسانی حقوق کی تنظیموں اور اقوامِ متحدہ سے مطالبہ کرتا ہے کہ وہ فوری اور مؤثر اقدامات کریں اور اقوامِ متحدہ کی سلامتی کونسل کی قراردادوں کو کشمیری عوام کی امنگوں کے مطابق نافذ کیا جائے۔

آئی ایس پی آر کے ترجمان کا مزید کہنا تھا کہ افواج پاکستان نے اس عزم کا اعادہ کیا کہ وہ کشمیری بھائیوں کے شانہ بشانہ کھڑے ہیں اور مسئلہ کشمیر پر اپنے منصفانہ موقف سے وابستہ رہیں گے۔ پاکستان کی مسلح افواج پاکستان کی خودمختاری اور علاقائی سالمیت کے تحفظ کے اپنے فرض پر قائم ہیں۔

پاکستان زندہ باد! کشمیر پائندہ باد!