لاہور: وزیر اعلیٰ پنجاب مریم نواز شریف نے کہا ہے کہ پنجاب کے خوبصورت سیاحتی حسن کو دنیا کے سامنے لائیں گے۔

وزیر اعلیٰ مریم نواز نے سیاحت کی بحالی کے عالمی دن پر پیغام دیتے ہوئے کہا کہ اللہ تعالیٰ نے بھی قرآن کریم میں سیاحت کی ترغیب اور تلقین کی ہے، پاکستان بے حد خوبصورت اور قدرتی حسن سے ما لامال ملک ہے۔

انہوں نے کہا کہ پنجاب کے مختلف خطوں میں سیاحت کا بے پناہ پوٹینشل پوشیدہ ہے، پنجاب صحراؤں پہاڑی سلسلے جھیلوں اور دریاؤں کی دھرتی ہے، پنجاب کے خوبصورت سیاحتی حسن کو دنیا کے سامنے لائیں گے۔

مریم نواز نے کہا کہ پنجاب میں سیاحت کے فروغ  کے لیے دیرپا اقدامات کیے جارہے ہیں، معیشت، مقامی ثقافت اور بین الاقوامی تعلقات کے استحکام کے لئے سیاحت ناگزیر ہے۔

وزیراعلیٰ نے کہا کہ اسلام آباد سے مری ۔ گلاس ٹرین پراجیکٹ سیاحت کے فروغ کے لئے گیم چینجر ثابت ہوگی، مری کو عالمی معیار کا سیاحتی مقام بنانے کے لئے ماسٹر پلان پر عملدرآمد جاری ہے۔

انکا کہنا تھا کہ سیاحوں کو محفوظ اور آرام دہ سفر کی سہولت کےلئے اہم روڈز کی اپ گریڈیشن کی جا رہی ہے، کرتار پور میں عالمی معیار کا ہوٹل بنائیں گے، مذہبی سیاحت کے فروغ پر خصوصی توجہ ہے۔

مریم نواز نے مزید کہا کہ پنجاب میں نئے پرکشش سیاحتی مقامات متعارف کرائے جا رہے ہیں، سیاحوں کی سیکیورٹی کو یقینی بنانے کے لیے بہترین حفاظتی انتظامات کیے گئے ہیں۔