کراچی میں ہونے والے آئی سی سی چیمپئنز ٹرافی کے میچز کے دوران شائقینِ کرکٹ کے لیے اہم ہدایات جاری کی گئی ہیں۔

نیشنل بینک اسٹیڈیم اور اس کے اطراف میں پارکنگ، سیکیورٹی، اور داخلے کے بارے میں معلومات فراہم کی گئی ہیں تاکہ شائقین کو کسی بھی قسم کی پریشانی کا سامنا نہ ہو۔

پارکنگ کی سہولت

چائنہ گراؤنڈ، نیشنل کوچنگ سینٹر اور ایکسپو سینٹر کو گاڑیوں اور موٹرسائیکلوں کی پارکنگ کے لیے مختص کیا گیا ہے۔ وی آئی پیز اور خصوصی پاسز والی گاڑیوں کی پارکنگ اسٹیڈیم کے اندر رکھی گئی ہے۔

راستوں کی بندش اور متبادل راستے

اسٹیڈیم کے اطراف تمام سڑکیں ٹریفک کی آمدورفت کے لیے کھلی رہیں گی، مگر سر شاہ سلیمان روڈ استعمال کرنے والی عوام الناس کو میچ کے دوران متبادل راستہ اختیار کرنے کی ہدایت کی گئی ہے تاکہ کسی قسم کی زحمت سے بچا جا سکے۔

داخلے کے راستے اور سیکیورٹی چیکنگ

شائقینِ کرکٹ اسٹیڈیم میں داخلے کے لیے مرکزی گیٹ اور گیٹ نمبر 04، 05، 06، 12، 13 اور 14 استعمال کر سکتے ہیں۔ تمام تماشائیوں کو داخلی دروازوں پر سیکیورٹی چیکنگ سے گزارا جائے گا، لہٰذا میچ شروع ہونے سے قبل اسٹیڈیم پہنچنے کی سفارش کی گئی ہے۔

میچ ٹکٹ اور شناختی کارڈ

اسٹیڈیم میں داخلے کے لیے شائقین کو اپنا اصل قومی شناختی کارڈ اور فزیکل میچ ٹکٹ (اصل میچ ٹکٹ کی ہارڈ کاپی) ہمراہ لانا لازمی ہے۔ آن لائن ٹکٹس پر اسٹیڈیم میں داخلہ ممکن نہیں ہوگا۔

ڈرون کیمروں کا استعمال ممنوع

اسٹیڈیم اور اس کے اطراف میں ہر قسم کے ڈرون کیمروں کے استعمال پر سخت پابندی عائد کی گئی ہے۔

شائقین سے درخواست ہے کہ وہ ہدایات پر عمل کرتے ہوئے میچ کے دوران کسی بھی قسم کی پریشانی سے بچنے کے لیے ان معلومات کا خیال رکھیں اور اپنے سفر کی تیاری مناسب وقت پر کر لیں۔