آئی سی سی چیمپئنز ٹرافی 2025 کے چوتھے میچ میں آسٹریلیا نے پہاڑ نما ہدف کو حاصل کر کے انگلینڈ کو 5 وکٹوں سے شکست دے دی۔

دنیائے کرکٹ کے سب سے پرانے حریف آسٹریلیا اور انگلینڈ کی ٹیم قذافی اسٹیڈیم میں مدمقابل تھیں، آسٹریلیا نے انگلینڈ کے 351 رنز کا ہدف 47.3 اوورز میں 5 وکٹوں کے نقصان پر حاصل کر لیا۔

کینگروز کی فتح میں جوش انگلس کا کردار سب سے نمایاں تھا جنہوں نے ناقابل شکست 120 رنز کی عمدہ اننگ کھیلی، ان کی اننگ میں 6 چھکے اور 8 چوکے شامل تھے۔

میتھیو شارٹ نے 63 رنز بنائے، مارنس لیبوشین نے 47 رنز کی اننگ کھیلی، ایلیکس کیری نے 69 رنز بنائے جبکہ گلین میکسویل 32 رنز بنا کر ناٹ آؤٹ رہے۔

انگلینڈ کی جانب سے مارک ووڈ، جوفرا آرچر، برائیڈن کارس، عادل رشید اور لیام لیونگسٹون نے ایک ایک کھلاڑی کو آؤٹ کیا۔

لاہور کے قذافی اسٹیڈیم میں کھیلے جا رہے میچ میں آسٹریلیا کے کپتان اسٹیو اسمتھ نے ٹاس جیت کر انگلینڈ کو بیٹنگ کی دعوت دی۔

انگلینڈ نے پہلے کھیلتے ہوئے مقررہ 50 اوورز میں 8 وکٹوں کے نقصان پر چیمپئنز ٹرافی کا سب سے بڑا ٹوٹل بناتے ہوئے 351 رنز بنائے۔ اس سے قبل نیوزی لینڈ نے 2004 میں امریکا کے خلاف 347 رنز بنائے تھے۔

انگلینڈ کی جانب سے بین ڈکٹ 165 رنز کی شاندار اننگز کھیل کر نمایاں رہے، انہوں نے 142 گیندوں کا سامنا کیا جس میں 3 چھکے اور 17 چوکے لگائے۔

علاوہ ازیں جوروٹ نے 78 گیندوں پر 68 رنز اسکور کیے جب کہ کپتان جوز بٹلر 23، جیمی اسمتھ 15 اور فل سالٹ 10 رنز بنا کر آؤٹ ہوئے۔

آسٹریلیا کی جانب سے بین ڈوارشئیس نے 3 وکٹیں حاصل کیں جب کہ ایڈم زیمپا اور مارنس لبوشین 2-2 وکٹیں کھلاڑیوں کا شکار کرنے میں کامیاب رہے۔

اس سے قبل ٹاس کے موقع پر آسٹریلوی کپتان اسٹیو اسمتھ کا کہنا تھا کہ ہماری پریکٹس کے دوران رات کے وقت یہاں اوس پڑ رہی تھی اس لیے پہلے فیلڈنگ کا فیصلہ کیا۔

اسٹیواسمتھ نے کہا کہ امید ہے میگاایونٹ کا اچھاآغازکریں گے، کوشش کریں گےانگلینڈ کوکم اسکورپرمحدودکریں، تاہم اہم بولرزکی کمی محسوس ہوگی۔

دوسری جانب انگلش کپتان جوزبٹلر نے کہا کہ کوشش ہوگی کہ آسٹریلیا کو بڑا ٹارگٹ دیں، آسٹریلیا کے خلاف آئی سی سی ایونٹ کا میچ ہمیشہ اہم ہوتا ہے۔

انگلینڈ کے کپتان جوز بٹلر کا یہ بھی کہنا تھا کہ ہم ٹاس جیت جاتے تو بیٹنگ کو ہی ترجیح دیتے، کھلاڑی پُراعتماد ہیں، ہم اس میچ کےلیے پُرجوش ہیں۔