وزیرِاعظم محمد شہباز شریف دو روزہ سرکاری دورے پر آج لاہور سے آذربائیجان روانہ ہوگئے ہیں۔

آذربائیجان کے صدر الہام علیوف کی دعوت پر وزیراعظم محمد شہباز شریف 24 سے 25 فروری 2025 تک جمہوریہ آذربائیجان کا دو روزہ سرکاری دورہ کریں گے۔

 وزیر اعظم محمد شہباز شریف کا مارچ 2024 میں وزارت عظمیٰ کا منصب سنبھالنے کے بعد آذربائیجان کا یہ دوسرا دورہ ہے۔

 دورے کے دوران وزیرِ اعظم شہباز شریف،  آذربائیجان کے ساتھ صدر دو طرفہ ملاقات کے علاوہ بزنس فورم سے بھی خطاب کریں گے۔

 ملاقات میں  باہمی دلچسپی کے شعبوں پر بات چیت ہوگی تاکہ توانائی، تجارت، دفاع، تعلیم اور موسمیاتی شعبوں میں دوطرفہ تعاون بڑھایا جاسکے،    اس دورے کے دوران دونوں ممالک کے مابین تعاون کے متعدد شعبوں میں  مفاہمتی یادداشتوں و  معاہدوں پر دستخط کیے جائیں گے۔

 وزیراعظم کا دورہ، آذربائیجان کے ساتھ پاکستان کے تعلقات کو مزید مستحکم کرنے، وسیع تر اقتصادی تعاون کو فروغ دینے اور مشترکہ ترقی کے لیے شراکت داری کی نئی راہیں تلاش کرنے کے لیے پاکستان کے عزم کی عکاسی ہے۔

نائب وزیر اعظم و وزیر خارجہ محمد اسحاق ڈار، وفاقی وزراء جام کمال خان، عبدالعلیم خان، چوہدری سالک حسین، عطاء اللہ تارڑ اور معاون خصوصی طارق فاطمی بھی دورے کے دوران وزیرِاعظم کے ہمراہ ہوں گے۔