اسلام آباد: وزیراعظم شہبازشریف نے وفاقی کابینہ کے خصوصی اجلاس سے خطاب کرتے ہوئے کہا کہ ہم نے معیشت کو ڈیفالٹ سے بچایا جس کو عالمی ادارے بھی تسلیم کررہے ہیں۔

وزیراعظم شہبازشریف نے وفاقی کابینہ کے خصوصی اجلاس سے خطاب کرتے ہوئے کہا کہ آج ہماری کابینہ کو ایک سال مکمل ہوگیا ہے۔

وزیراعظم نے اجلاس میں شریک وزرا کو خوش آمدید کہا اور اس موقع پر ملک کی معیشت کی بہتری، داخلی سیاست اور عالمی تعلقات پر روشنی ڈالی۔

وزیراعظم شہبازشریف نے کہا کہ رمضان ہمیں خدمت انسانیت کا درس دیتا ہے اور اس مقدس مہینے میں حکومت نے عوام کو 20 ارب روپے کا ریلیف فراہم کرنے کا فیصلہ کیا۔

انہوں نے فلسطینی مسلمانوں کے لیے خوراک کی بندش کو ظلم قرار دیتے ہوئے اس بات کا اعادہ کیا کہ حکومت فلسطینیوں اور کشمیریوں کے ساتھ اظہار یکجہتی کرتی ہے اور ان کی قربانیوں کو ہمیشہ یاد رکھے گی کیونکہ 50 ہزار سے زائد فلسطینی شہید ہوچکے ہیں۔

معاشی حوالے سے وزیراعظم نے کہا کہ حکومت نے بروقت اقدامات اٹھا کر ملک کو دیوالیہ ہونے سے بچایا اور معاشی اشاریے مثبت ہونے کی وجہ سے عالمی مالیاتی ادارے بھی پاکستان کی اصلاحات کو تسلیم کر رہے ہیں۔

وزیراعظم نے کہا کہ ایک سال پہلے ملک کی معیشت مشکلات سے دوچار تھی لیکن اتحاد اور ٹیم ورک کی بدولت ہم نے ان چیلنجز کو کامیابی سے عبور کیا۔ انھوں نے پی ڈی ایم حکومت کے اتحادیوں کی محنت اور نوازشریف کے کردار کو سراہا۔

وزیراعظم نے مزید کہا کہ آئی ایم ایف سے متعلق مشکل وقت میں پاکستان کو 5 ارب ڈالر کی کمی کا سامنا تھا لیکن دوست ممالک سے مدد حاصل کرکے اس کمی کو پورا کیا گیا۔ سعودی عرب اور ابوظہبی نے حالیہ دنوں میں پاکستان کی مدد کی۔

مہنگائی کی شرح پر بات کرتے ہوئے وزیراعظم نے بتایا کہ یہ 28 فیصد سے کم ہو کر 1.6 فیصد تک آچکی ہے۔ انہوں نے اپوزیشن کی جانب سے حکومت کے خلاف کوئی اسکینڈل نہ لانے کا بھی ذکر کیا اور کہا کہ ملک کی بہتری کے لیے سب کو ایک ساتھ مل کر کام کرنا چاہیے۔