اسلام آباد: وزیراعظم محمد شہباز شریف نے کہا ہے کہ افغانستان میں انسداد دہشت گردی کی کوششوں میں پاکستان کے کردار کو تسلیم کرنے پر امریکی صدر کے شکر گزار ہیں۔

وزیراعظم شہباز شریف نے اپنے جاری کردہ بیان میں کہا ہے کہ ہم امریکی صدر ڈونلڈ ٹرمپ کا شکریہ ادا کرتے ہیں کہ انہوں نے افغانستان میں انسداد دہشت گردی کی کوششوں میں پاکستان کے کردار کا اعتراف کیا۔

انہوں نے کہا کہ امریکی صدر نے آئی ایس کے پی کے آپریشنل کمانڈر شریف اللہ جو کہ افغانستان کا شہری اور ایک مطلوب دہشت گرد ہے کی پاک افغان سرحدی علاقے میں کامیاب کارروائی کے دوران گرفتاری کے تناظر میں پاکستان کے کردار کو سراہا۔

وزیراعظم نے کہا کہ پاکستان نے ہمیشہ انسداد دہشت گردی کی کوششوں میں ایک اہم کردار ادا کیا ہے، پاکستان دہشت گردوں اور عسکریت پسند گروپوں کو کسی دوسرے ملک کے خلاف کارروائی کرنے کے لیے محفوظ پناہ گاہوں کی فراہمی کو روکنے پر یقین رکھتا ہے۔

شہباز شریف نے کہا کہ ہم دہشت گردی کے مظاہر سے نمٹنے کے لیے اپنے عزم پر ثابت قدم ہیں، اس کوشش میں پاکستان نے بڑی قربانیاں دی ہیں، جن میں ہمارے 80,000 سے زیادہ بہادر فوجیوں اور شہریوں نے جانیں قربان کیں۔

انکا کہنا تھا کہ ہمارے ملک سے دہشت گردی کی لعنت کو ختم کرنے کے لیے ہماری قیادت اور ہمارے عوام کا عزم غیر متزلزل ہے۔

وزیراعظم نے مزید کہا کہ ہم علاقائی امن اور استحکام کے لیے امریکہ کے ساتھ قریبی شراکت داری جاری رکھیں گے۔