وفاقی وزیر نجکاری،سرمایہ کاری بورڈ و مواصلات عبدالعلیم خان نے کہا کہ امید ہے کہ اگلے تین ماہ میں پی آئی اے کی نجکاری کے تمام مراحل طے کر لیں گے۔

پی آئی اے کی پرائیویٹائزیشن کے حوالے سے وفاقی وزیر نجکاری،سرمایہ کاری بورڈ و مواصلات عبدالعلیم خان نے خصوصی گفتگو کرتے ہوئے کہا کہ پی آئی اے کی نجکاری میں دلچسپی رکھنے والی پارٹیوں کے تحفظات دور کر دیے گئے ہیں، جبکہ حکومت نے خواہشمند پارٹیوں کے مطابق تبدیلیاں لانے کا فیصلہ کر لیا ہے۔

وفاقی وزیر نے کہا کہ پی آئی اے کی نجکاری کو زیادہ سے زیادہ پُر کشش بنانے کیلئے نیا لائحہ عمل دے رہے ہیں، امید ہے کہ اگلے تین ماہ میں پی آئی اے کی نجکاری کے تمام مراحل طے کر لیں گے۔

عبدالعلیم خان نے کہا کہ پی آئی اے کی نجکاری میں انویسٹرز کی طرف سے بہت بہتر اظہار دلچسپی آنے کی توقع ہے، یورپ کے لیے پی آئی اے کی فلائٹس کے آغاز سے نجکاری کا ماحول مزید سازگار ہوگا۔

وفاقی وزیر کا یہ کہنا تھا کہ حالیہ اقدامات کے باعث یہ قومی ادارہ دوبارہ منافع بخش ہورہاہے، آئندہ تین ماہ میں برطانیہ کے لیے بھی پی آئی اے کی فلائٹس شروع ہونے جارہی ہیں۔

عبدالعلیم خان نے کہا کہ  24کروڑ پاکستانیوں کی اولین ترجیح پی آئی اے سے سفر کرنا ہے، یورپ اور برطانیہ کے بعد اگلے مرحلے میں امریکہ اور مشرق بعید کیلئے فلائٹس کھولنا ہے۔

وفاقی وزیر نے یہ بھی کہا کہ پی آئی اے کی ساکھ بحال کر کے اسے واپس اپنے عروج پر پہنچائیں گے، پی آئی اے میں آج بھی اتنا ’’پوٹینشل‘‘ موجود ہے کہ اسے منافع بخش بنایا جا سکے، پی آئی اے نجکاری پہلے سے کہیں بہتر اور قابل عمل ہونے جا رہی ہے۔