گلگت بلتستان: گلگت بلتستان کے پہاڑوں میں نایاب برفانی تیندووں کی ایک ساتھ موجودگی کا انکشاف ہوا ہے جو ماہرین کے مطابق حیاتیاتی تنوع اور ماحولیاتی صحت کے لیے خوش آئند خبر ہے۔

یہ شاندار تصاویر وائلڈ لائف واچر سخاوت علی اور چیف کنزرویٹر پارکس اینڈ وائلڈ لائف، فاریسٹ، وائلڈ لائف اینڈ انوائرمنٹ ڈیپارٹمنٹ، گلگت بلتستان ڈاکٹر ذاکر حسین نے حاصل کی ہیں۔

ماہرین کا کہنا ہے کہ برفانی تیندوے عام طور پر چھپ کر رہنے والے جانور ہیں اور ان کا اس طرح نظر آنا ایک غیر معمولی واقعہ ہے جو اس بات کی نشاندہی کرتا ہے کہ اس خطے میں ان کی افزائش اور بہتر ماحول کی صورتحال ہے۔

برفانی تیندوا دنیا کے نایاب اور معدومیت کے خطرے سے دوچار جانوروں میں شامل ہے اور عالمی ادارے اس کے تحفظ کے لئے مختلف منصوبوں پر کام کر رہے ہیں۔

گلگت بلتستان میں برفانی تیندووں کی موجودگی اس بات کا ثبوت ہے کہ مقامی ماحولیاتی نظام اب بھی ان کی بقا کے لئے موزوں ہے۔

ماہرین کا کہنا ہے کہ ان جانوروں کی موجودگی کو برقرار رکھنے کے لیے ضروری ہے کہ ان کے قدرتی ماحول کا تحفظ کیا جائے اور غیر قانونی شکار کی روک تھام کو یقینی بنایا جائے۔

مقامی حکام نے عوام سے اپیل کی ہے کہ وہ جنگلی حیات کے تحفظ میں تعاون کریں اور ان نایاب جانوروں کے بارے میں کسی بھی قسم کی غیر قانونی سرگرمی کی اطلاع دیں۔

یہ دریافت پاکستان میں جنگلی حیات کے تحفظ کی کوششوں میں ایک مثبت پیش رفت سمجھی جا رہی ہے اور ماحولیاتی ماہرین امید کر رہے ہیں کہ مستقبل میں ان جانوروں کی تعداد میں مزید اضافہ ہوگا۔