وفاقی وزیر برائے منصوبہ بندی ترقی و خصوصی اقدامات، احسن اقبال کی زیر صدارت ایس آئی ایف سی (SIFC) کی ایگزیکٹو کمیٹی کا تیرھواں اجلاس منعقد ہوا۔

اجلاس میں وفاقی وزراء، نیشنل کوآرڈینیٹر ایس آئی ایف سی، وفاقی و صوبائی سیکریٹریز، اور اعلیٰ حکومتی حکام نے شرکت کی۔

اجلاس کے دوران مختلف شعبوں میں جاری منصوبوں اور پالیسی اقدامات کی پیش رفت کا تفصیلی جائزہ لیا گیا۔ ایس آئی ایف سی کے پلیٹ فارم پر مختلف ترقیاتی منصوبوں کو آگے بڑھانے کے حوالے سے جامع حکمت عملی مرتب کی گئی۔

اجلاس میں کنیکٹیویٹی و انفراسٹرکچر، تیل و گیس، بندرگاہوں و بحری امور جیسے اہم شعبوں پر تفصیل سے تبادلہ خیال کیا گیا۔

خصوصی طور پر بلوچستان، پنجاب، اور سندھ میں موٹر وے اور شاہراہوں کے جاری منصوبوں کی پیش رفت کا جائزہ لیا گیا اور ان منصوبوں کی تکمیل میں تیز رفتاری لانے کے لیے ضروری اقدامات پر غور کیا گیا۔

کمیٹی نے بندرگاہوں سے منسلک سڑکوں کی تیز رفتار تکمیل کے لیے پبلک-پرائیویٹ پارٹنرشپ ماڈل اپنانے پر زور دیا۔ نجی شعبے کی سرمایہ کاری کو مؤثر طریقے سے بروئے کار لانے کے لیے حکومت نے اس ماڈل کو ترجیح دینے کا فیصلہ کیا۔

کمیٹی نے بین الوزارتی امور کو جلد از جلد حل کرنے کے لیے پالیسی اقدامات اور متعلقہ فریقین سے مشاورت کا عمل تیز کرنے کی ہدایت کی۔