انٹرمیڈیٹ امتحانات قریب، ای مارکنگ کے اصول تاحال غیر واضح ہیں۔

اساتذہ اور طلبہ بے خبر ہیں، جبکہ ای مارکنگ کے تحت پرچے حل کرنے کا طریقہ ابھی تک معلوم نہیں ہے۔

 انٹربورڈ کراچی ای مارکنگ کے روبریکس فراہم کرنے میں ناکام، جس کی وجہ سے طلبہ کافی پریشان ہیں۔

  سندھ پروفیسر اینڈ لیکچرار ایسوسی ایشن(سپلا) نے ای مارکنگ کے فیصلے پر سخت اعتراض کرتے ہوئے کہا کہ بغیر تیاری کے ای مارکنگ کے نفاذ سے طلبہ کے نتائج پر منفی اثرات کا خدشہ ہے۔

سپلا کے مطابق روبریکس وہ معیارات ہوتے ہیں جن کے تحت کسی امتحانی پرچے کی جانچ اور نمبر دیے جاتے ہیں، ای مارکنگ کے تناظر میں روبریکس کی اہمیت مزید بڑھ جاتی ہے، اس کے علاوہ ای مارکنگ میں اساتذہ کو ایک خاص ڈیجیٹل فارمیٹ میں جوابات چیک کرنے ہوتے ہیں۔

سندھ پروفیسر اینڈ لیکچرار ایسوسی ایشن نے کہا کہ ای مارکنگ سے پہلے مکمل تجربات ضروری ہوتے ہیں، طلبہ ای مارکنگ کے مطابق پرچہ حل کرنے کا طریقہ سے لاعلم ہیں، اساتذہ کو یہ نہیں معلوم کہ پرچے کس فارمیٹ میں آئیں گے، انہیں چیک کرنے کا طریقہ کیا ہوگا۔

سپلا نے یہ بھی کہا کہ ای مارکنگ کے نفاذ سے پہلے اساتذہ کی تربیت ضروری تھی،اور طلبہ کو بھی آگاہ کیا جانا چاہیے تھا، جب تک تمام تجربات مکمل نہیں ہو جاتے، تب تک اس سسٹم کا نفاذ درست فیصلہ نہیں۔

سندھ پروفیسر اینڈ لیکچرار ایسوسی ایشن نے مطالبہ کیا کہ ای مارکنگ کے نفاذ سے قبل مکمل حکمت عملی بنائی جائے۔

واضح رہے کہ انٹربورڈ کراچی نے 2025 کے سالانہ امتحانات میں ای مارکنگ کا تجربہ کرنے کا فیصلہ کیا تھا، جبکہ رواں انٹرکے امتحانات میں سائنس جنرل فیکلٹی کے ریاضی کے پرچوں میں ای مارکنگ کا نظام نافذ کیا جائے گا۔