اسلام آباد: آرمی چیف جنرل عاصم منیر نے قومی سلامتی کی پارلیمانی کمیٹی میں واضح پیغام دیتے ہوئے کہا کہ ملکی سلامتی سے بڑا کوئی ایجنڈا، کوئی تحریک اور کوئی شخصیت نہیں ہے۔

آرمی چیف جنرل سید عاصم منیر نے قومی سلامتی کی پارلیمانی کمیٹی سے خطاب میں کہا کہ ملکی سلامتی سے بڑا کوئی ایجنڈا نہیں، کوئی تحریک نہیں اور کوئی شخصیت نہیں ہے جب کہ پائیدار استحکام کے لئے قومی طاقت کے تمام عناصر کو ہم آہنگی کے ساتھ کام کرنا ہوگا۔

آرمی چیف نے کہا کہ یہ ہماری اور ہماری آنے والی نسلوں کی بقاء کی جنگ ہے، ہم کو بہتر گورننس اور مملکت پاکستان کو ہارڈ اسٹیٹ بنانے کی ضرورت ہے اور ہم کب تک ایک سافٹ اسٹیٹ کے طرز پر بے پناہ جانوں کی قربانی دیتے رہیں گے؟۔

ان کا کہنا تھا کہ ہم گورننس کے گیپس کو کب تک افوج پاکستان اور شہداء کے خون سے بھرتے رہیں گے؟، علماء سے درخواست ہے کہ وہ خوارج کی طرف سے اسلام کی مسخ شدہ تشریح کا پردہ چاک کریں۔

آرمی چیف کہتے ہیں کہ یہ ملک ہے تو ہم ہیں، ملکی سلامتی سے بڑھ کر ہمارے لئےکوئی چیز نہیں جب کہ ملک کےتحفظ کے لئے یک زبان ہوکر سیاسی و ذاتی مفادات سے بالاتر ہوکر ایک بیانیہ اپنانا ہوگا۔

انہوں نے یہ بھی کہا کہ جوسمجھتے ہیں کہ پاکستان کو کمزور کرسکتے ہیں تو آج ان کوپیغام دیتا ہوں، ہم متحد ہوکر نہ صرف ان کو بلکہ ان کے تمام سہولت کاروں کو بھی ناکام کریں گے۔ ہمیں اللہ پر پورا بھروسہ ہے جو کچھ بھی ہوجائے انشاءاللہ ہم کامیاب ہوں گے۔