وفاقی کابینہ کا اجلاس آج صبح 11 بجے وزیر اعظم شہباز شریف کی زیر صدارت ہوگا۔ اجلاس میں ملکی سیاسی و معاشی صورتحال سمیت 12 نکاتی اہم ایجنڈے پر غور کیا جائے گا۔

اجلاس کے ایجنڈے میں پاکستان آرڈیننس فیکٹری اور ہیوی انڈسٹریز ٹیکسلا کے بورڈ ممبران کی تقرری شامل ہے، وفاقی کابینہ ان اداروں کے بورڈ ممبران کی تقرری کی منظوری دے گی۔

کابینہ بین الاقوامی تنازعات کے حل کے لیے ایک کنونشن پر دستخط کرنے کی منظوری دے گی، جبکہ پاکستان اور ہنگری کی وزارت خارجہ و تجارت کے درمیان معاہدے پر دستخط کرنے کی منظوری دی جائے گی۔

اجلاس میں وزارت صنعت و پیداوار اور بین الاقوامی مالیاتی کارپوریشن کے درمیان ای-موبلٹی پر تعاون کے معاہدے پر دستخط کرنے کی منظوری دی جائے گی۔

وزارت داخلہ کی جانب سے اسلام آباد ہائی کورٹ کی ہدایات سے متعلق سمری کی منظوری ایجنڈے میں شامل ہے۔

وفاقی کابینہ وسل بلوئر پروٹیکشن اینڈ ویجیلنس کمیشن ایکٹ، 2025 پر غور کرے گی، چیئرمین پاکستان ٹوبیکو بورڈ (PTB) کا اضافی چارج سونپنے کے حوالے سے فیصلہ کیا جائے گا۔

اجلاس میں وسائل کی نقل و حرکت اور استعمال میں بہتری کے پروگرام کی تکمیل پر بھی غور کیا جائے گا۔

وفاقی کابینہ انکم ٹیکس ترمیمی بل، 2025  کے ذریعے کل وقتی اساتذہ اور محققین کی آمدنی پر ٹیکس چھوٹ کی بحالی کی منظوری دی جائے گی۔

اس کے علاوہ 11  مارچ کو ہونے والے کابینہ کمیٹی برائے نجکاری کے فیصلوں کی توثیق کی جائے گی، اور کابینہ کی اقتصادی رابطہ کمیٹی کے 13 اور 21 مارچ کو ہونے والے اجلاسوں کے فیصلوں کی توثیق ایجنڈے میں شامل ہے۔