دفتر خارجہ کے ترجمان شفقت علی خان نے کہا کہ بھارت اقلیتوں کے حقوق کا چیمپئن بننے کی حیثیت نہیں رکھتا۔

ترجمان دفتر خارجہ نے بھارتی وزیر خارجہ کے لوک سبھا میں بیان اور پاکستان میں اقلیتوں کی صورتحال پر بحث پر ردعمل دیتے ہوئے کہا کہ بھارت خود انہی حقوق کی تسلسل سے خلاف ورزی کرنے والا ملک ہے، پاکستان میں ریاستی ادارے پالیسی کے طور پر اقلیتوں کے تحفظ کے لیے فعال کردار ادا کرتے ہیں۔

شفقت علی خان نے کہا کہ اس کے برعکس، بھارت میں اقلیتوں کو نشانہ بنانے والے واقعات اکثر حکومتی حلقوں کی خاموش منظوری بلکہ بعض اوقات ان کی شمولیت کے ساتھ پیش آتے ہیں، بھارت میں اقلیتوں خاص طور پر مسلمانوں کے خلاف منظم نفرت، امتیاز اور تشدد کی حوصلہ افزائی ریکارڈ پر ہے۔

ترجمان دفتر خارجہ کا کہنا تھا کہ امتیازی شہریت ترمیمی ایکٹ  سے  گھروں کو بلڈوز کرنے، 2002 کے گجرات قتل عام سے2020 کے دہلی فسادات تک بھارت کا دامن داغدار ہے۔

شفقت علی خان نے کہا کہ  1992 میں بابری مسجد کے انہدام سے 2024 میں اس کے ملبے پر مندر کی تعمیر ،گاؤ رکھشکوں اور ہجوم کی جانب سے سرعام قتل سے مساجد اور مزاروں پر حملوں تک بھارت کا ریکارڈ اقلیتوں کے حقوق کی سنگین اور منظم خلاف ورزیوں سے داغدار ہے۔

ترجمان دفتر خارجہ نے کہا کہ دوسروں کے ہاں اقلیتوں کے بارے میں مصنوعی تشویش کا اظہار کرنے کے بجائے، بھارتی حکومت اپنی ناکامیوں کو دور کرے، مسلمانوں سمیت تمام اقلیتوں کی حفاظت، بہبود اور ان کے حقوق کو یقینی بنانے کے لیے ٹھوس اقدامات کرنے چاہیئں، بھارت کو اقلیتوں کی عبادت گاہوں، ثقافتی ورثے اور بنیادی حقوق کا تحفظ کرنا ہوگا۔