ریاض: سعودی عرب میں شوال کا چاند نظر آگیا ہے اور عید الفطر کل بروز اتوار کو منائی جائے گی۔

سعودی میڈیا کے مطابق شوال کا چاند دیکھنے کے لئے مکہ، مدینہ، تبوک اور دمام سمیت 10 سے زائد مقامات پر رویت ہلال کمیٹیوں کے اجلاس ہوئے۔

سعودی میڈیا کا کہنا ہے کہ مملکت میں شوال کا چاند نظر آگیا ہے جس کے بعد عید الفطر کل منائی جائے گی۔

خیال رہے کہ سعودی سپریم کورٹ نے بھی عوام سے آج شوال کا چاند دیکھنے کی اپیل کرتے ہوئے کہا تھا کہ ملکی و غیرملکی بھی چاند کی گواہی دے سکتے ہیں۔

دوسری جانب ملائیشیا اور انڈونیشیا میں شوال کا چاند نظر نہیں آیا ہے جس کے عیدالفطر بروز پیر کو ہوگی جب کہ پاکستان میں رویت ہلال کمیٹی کا مرکزی اجلاس کل اسلام آباد میں منعقد ہوگا۔

پاکستان میں چاند ہونے یا  نہ ہونے کا حتمی اعلان مولانا عبدالخبیر آزاد کریں گے، محکمہ موسمیات کے مطابق شوال کے چاند کی پیدائش 29 مارچ کو 3 بج کر 58 منٹ پرہوگی۔

محکمہ موسمیات کا کہنا تھا کہ 30 مارچ کو رویت کے وقت چاند کی عمر 27 گھنٹے ہوگی جب کہ غروب آفتاب کے بعد چاند 70 منٹ تک آسمان پر موجود رہے گا۔

محکمہ موسمیات نے بتایا کہ 20 گھنٹے کے چاند کو براہ راست دیکھا جاسکتا ہے، 16 سے 18 گھنٹے کی عمر کے چاند کو دوربین سے دیکھا جاسکتا ہے جب کہ 30 مارچ کو چاند نظر آنے کا قوی امکان ہے۔