کراچی میں ٹریفک حادثات کا نہ تھمنے والا سلسلہ جاری ہے، عید کے روز بھی سڑکوں پر موت رقصاں رہی۔ گلشن اقبال ڈسکو بیکری کے قریب تیز رفتار گاڑی کی ٹکر سے کم عمر لڑکا جان کی بازی ہار گیا۔

ریسکیو حکام کے مطابق سال 2024 کے ابتدائی تین ماہ میں ٹریفک حادثات کے نتیجے میں 232 افراد زندگی کی بازی ہار چکے ہیں، جب کہ 3000 سے زائد افراد زخمی ہو چکے ہیں۔

اعدادوشمار کے مطابق کراچی میں بھاری گاڑیوں کی ٹکر جان لیوا ثابت ہو رہی ہے۔

ڈمپر کی ٹکر سے 17 افراد جان کی بازی ہار چکے ہیں، ٹریلر کے نیچے آ کر 24 افراد ہلاک ہو گئے اور واٹر ٹینکر کی زد میں آ کر 15 افراد جان سے گئے۔

مزدا گاڑی کی ٹکر سے 6 افراد جاں بحق ہوئے جبکہ بس نے 9 افراد کی زندگی چھین لی۔

ٹریفک حادثات میں جاں بحق ہونے والوں میں زیادہ تعداد موٹر سائیکل سواروں کی ہے، جو تیز رفتاری اور لاپرواہی کے باعث جان سے ہاتھ دھو بیٹھے۔

ریسکیو حکام کے مطابق زندگیاں چھیننے والے حادثات میں مرد، خواتین اور بچے بھی شامل ہیں۔

 حادثات میں جاں بحق ہونے والے 176 افراد مرد تھے، 26 خواتین، 23 معصوم بچے اور 7 بچیاں بھی بے رحم سڑکوں کی  نذر ہو گئیں۔

کراچی میں بڑھتے ہوئے ٹریفک حادثات کے باعث شہری شدید خوف و ہراس کا شکار ہیں۔ ماہرین کا کہنا ہے کہ ٹریفک قوانین پر سختی سے عمل درآمد اور ہیوی ٹریفک کے لیے موثر حکمت عملی نہ اپنائی گئی تو یہ حادثات مزید جانیں لیتے رہیں گے۔