لاہور: فخرزمان پی ایس ایل 10 میں لاہور قلندرز کو فائنل میں پہنچانے کے لیے پُرامید ہیں۔

پاکستان سپر لیگ (پی ایس ایل) 10 کے آغاز سے قبل لاہور قلندرز کے بیٹر فخر زمان نے اپنی تیاریوں پر بات کرتے ہوئے کہا کہ ڈیڑھ ماہ بعد بیٹنگ کرنا ایک منفرد تجربہ رہا اور ابتدائی طور پر کچھ عجیب محسوس ہوا۔

ان کا کہنا تھا ’’پہلا دن اچھا اور مشکل رہا، ایسا لگا جیسے میں بغیر پیڈز کے بیٹنگ کر رہا ہوں، ابھی پہلے میچ میں وقت ہے جب میں آخر میں بیٹنگ کر رہا تھا تو بیٹ پر گیند آرہا تھا جب کہ مجھے امید ہے کہ اگلے تین چار روز میں مکمل ردھم میں آجاؤں گا‘‘۔

اپنے انفرادی اہداف پر بات کرتے ہوئے فخر زمان نے کہا ’’میرا ہمیشہ یہی ہدف ہوتا ہے کہ میں بہترین بیٹر بنوں اور ٹیم کو فائنل جتواؤں۔ اس بار بھی میرا یہی مقصد ہے کہ لاہور قلندرز کو فائنل تک لے جاؤں اور جیت دلاؤں‘‘۔

انہوں نے مزید کہا ’’پی ایس ایل میں بیٹنگ اور بولنگ کا معیار بہت اعلیٰ ہوتا ہے جس کی وجہ سے مقابلہ سخت رہتا ہے۔ میں نہ صرف اپنی ٹیم بلکہ دوسری فرنچائزز کے نوجوان کھلاڑیوں کے ساتھ بھی اپنا تجربہ شیئر کرتا ہوں‘‘۔

لاہور قلندرز کی حکمت عملی پر بات کرتے ہوئے فخر زمان نے کہا ’’ہم ہر میچ کو فائنل سمجھ کر کھیلیں گے جب کہ ہمارا فوکس ہر مقابلے پر ہوگا اور تمام کھلاڑی بہترین کارکردگی پیش کرنے کی کوشش کریں گے‘‘۔