اسلام آباد: وفاقی وزیر داخلہ محسن نقوی نے انسانی اسمگلنگ میں ملوث مافیا کیخلاف ملک بھر میں مؤثر کریک ڈاؤن کا حکم دے دیا۔

وزیر داخلہ محسن نقوی سے نئے تعینات ڈی جی ایف آئی اے رفعت مختار راجہ اور نئے تعینات ڈائریکٹر جنرل نیشنل سائبر کرائم انویسٹیگیشن ایجنسی (NCCIA) وقار الدین سید کی ملاقات ہوئی جس میں وفاقی وزیر نے سائبر کرائمز کی روک تھام کے لیے ڈی جی این سی سی آئی اے کو ہدایات دیں۔

ملاقات میں وزیر داخلہ نے ڈی جی ایف آئی اے کو غیر قانونی امیگریشن کے خلاف موثر حکمت عملی تیار کرنے کا ٹاسک دے دیا۔

اس دوران محسن نقوی نے گفتگو کرتے ہوئے کہا کہ انسانی سمگلنگ روکنے کے لئے چاروں صوبوں میں بلا امتیاز کارروائی عمل میں  لائی جائے، اس مافیا سے آہنی ہاتھوں سے نمٹا جائے، مکروہ دھندے میں ملوث لوگ معصوم لوگوں کی جانوں سے کھیل رہے ہیں۔

انہوں نے کہا کہ ایف آئی اے سمیت تمام قانون نافذ کرنے والے اداروں کو ملک سے غیر قانونی اسپیکٹرم اور منظم جرائم کے خاتمے کیلئے ملکر کام کرنا ہو گا، سائبر سیکیورٹی ایک نیا چیلنج ہے۔

وفاقی وزیر داخلہ نے مزید کہا کہ این سی سی آئی اے کی استعدادکار بڑھائی جائے گی اور افسروں کو تربیت کے لئے بیرون ملک بجھوایا جائے گا۔

یاد رہے کہ وزیر مملکت داخلہ طلال چوہدری اور وفاقی سیکریٹری داخلہ محمد خرم آغا بھی اس موقع پر موجود تھے۔