وفاقی وزیر داخلہ محسن نقوی نے دہشتگردی ایک عالمی چیلنج ہے، عالمی برادری کو پاکستان کے ساتھ بھر پور تعاون کرنے کی اشد ضرورت ہے، انسداد دہشتگردی کے شعبے میں انٹیلیجنس اور ٹیکنالوجی  شیئرنگ انتہائی اہمیت کی حامل ہے۔

 وفاقی وزیر داخلہ محسن نقوی سے امریکی کانگریس مینز  کے وفد نے اسلام آباد میں اہم ملاقات کی، جس میں معیشت، تجارت اور سرمایہ کاری کے شعبوں میں تعاون  آگے بڑھانے پر بھی گفتگو ہوئی، اس کے علاوہ  سیکیورٹی، انسداد دہشت گردی اور بارڈر سیکیورٹی کے شعبوں پر تبادلہ خیال کیا گیا۔

محسن نقوی نے ملاقات کے دوران گفتگو کرتے ہوئے کہا کہ امریکہ سے پائیدار تعلقات پاکستان کی خارجہ پالیسی میں کلیدی حیثیت رکھتے ہیں، امریکہ میں 30 اپریل کو پاکستان کاکس کا انعقاد خوش آئند ہے۔

وفاقی وزیر داخلہ نے کہا کہ پاکستان دہشتگردی اور دنیا کے درمیان دیوار کی حیثیت رکھتا ہے، دہشتگردی کے خلاف پاکستان کی بے پایاں قربانیوں کی اقوام عالم میں نظیر نہیں ملتی۔

 محسن نقوی کاکہنا ہے کہ امریکی کانگریس مینز کا دورہ  دہشت گردی کے خلاف پاکستان کے بے مثال کردار کو اجاگر کرنے کے حوالے سے انتہائی اہم ثابت ہو گا، امریکی وفد نے حالیہ منرلز انویسٹمنٹ فورم 2025 میں شرکت کی جوکہ خوش آئند ہے،

وفاقی وزیر داخلہ نے یہ بھی کہا کہ حکومت کی جانب سے سرمایہ کاروں کو ہر ممکن سہولت اور ان کی سرمایہ کاری کو مکمل تحفظ فراہم کیا جائے گا۔

اس موقع پر وزیر مملکت برائے داخلہ طلال چوہدری نے کہاکہ اسلام آباد میں جون میں ہونے والا مشترکہ کاؤنٹر ٹیررازم ڈائیلاگ، انسدادِ دہشتگردی کے حوالے سے باہمی تعاون کو مزید فروغ دینے میں کلیدی کردار ادا کرے گا۔

دوسری جانب امریکی  کانگریس مینز  کا کہنا ہے کہ دہشتگردی کے خلاف جنگ میں پاکستان کے کردار کو بھر پور طریقے سے اجاگر کرنے کی ضرورت ہے، امریکہ میں مقیم پاکستانی کمیونٹی  با صلاحیت اور قابل ہے۔

ملاقات میں امریکی وفد میں  کانگریس مینز جیک برگمین، ٹام سوزی اور جوناتھن جیکسن شامل تھے، جبکہ ملاقات میں وزیر مملکت داخلہ طلال چوہدری، قائمقام امریکی سفیر نیٹلی بیکر اور وفاقی سیکرٹری داخلہ خرم آغا بھی موجود تھے۔