کراچی: میئر کراچی مرتضیٰ وہاب نے ایشیا کی سب سے بڑی مویشی منڈی کا افتتاح کرتے ہوئے بہتر انتظامات اور سیکیورٹی کی یقین دہانی کرادی۔

میئر کراچی بیرسٹر مرتضیٰ وہاب نے مویشی منڈی کا افتتاح کیا جب کہ ان کے ہمراہ ڈپٹی میئر کراچی سلمان عبداللہ مراد، منگو پیر ٹاؤن کے چیئرمین حاجی نواز بروہی اور دیگر بلدیاتی نمائندے بھی موجود تھے۔

افتتاحی تقریب سے خطاب کرتے ہوئے مرتضیٰ وہاب نے کہا کہ کراچی کی یہ مویشی منڈی لاکھوں جانوروں کی آمد اور ہزاروں خریداروں کی دلچسپی کا مرکز بنتی ہے۔

انہوں نے منڈی انتظامیہ کا شکریہ ادا کرتے ہوئے کہا کہ آج گرمی ضرور زیادہ ہے، مگر اگر ہم ہنستے رہیں گے تو مسائل بھی حل ہوجائیں گے۔ کراچی والوں کی سخاوت اور بیوپاریوں کی محنت کی بدولت منڈی ہر سال ایک بڑی رونق کا سبب بنتی ہے۔

ان کا کہنا تھا کہ قربانی کی خریداری کے دوران خریداروں اور بیوپاریوں کی سہولت کا خیال رکھا جائے گا۔ صفائی، سیکیورٹی اور ٹریفک کے مسائل حل کیے جائیں گے، خصوصاً آخری دنوں میں ٹریفک کی روانی کے لیے خصوصی اقدامات کیے جائیں گے۔

میئر کراچی نے کہا کہ کراچی چلتا ہے تو پاکستان چلتا ہے، پورے ملک سے بیوپاری کراچی کا رخ کرتے ہیں تاکہ بہتر منافع حاصل کرسکیں۔ تاہم گلی محلوں میں منڈی لگانے کی اجازت نہیں دی جائے گی۔

مرتضیٰ وہاب کہتے ہیں کہ قربانی کے لیے گائے اور بکرے کا انتخاب کرتے ہیں اور اسی منڈی سے خریداری کریں گے۔ بلاول بھٹو کے نمائندوں نے کراچی میں بہتری کا سفر شروع کیا ہے جو جاری رہے گا۔ تبدیلی کا لفظ بدنام ہوچکا اور یہ بہتری کا سال ہے۔

تقریب کے آخر میں ایڈمنسٹریٹر شہاب علی نے مہمانوں کا شکریہ ادا کیا جبک ہ مویشی منڈی کی ترجمان ایم آیمن نے میڈیا کا خصوصی شکریہ ادا کرتے ہوئے کہا کہ میڈیا منڈی کو عیدالاضحی تک چار چاند لگانے میں کلیدی کردار ادا کرتا ہے۔

تقریب کے اختتام پر دلکش آتش بازی (فائر ورک) کا مظاہرہ بھی کیا گیا جس سے تقریب کا ماحول مزید رنگین ہوگیا۔