بھارت کی جانب سے پاکستانی ٹی وی چینلز، صحافیوں اور اینکرپرسنز کے یوٹیوب چینلز کو بند کرنے کے اقدام پر وفاقی وزیر اطلاعات عطاء تارڑ نے شدید ردعمل ظاہر کرتے ہوئے ملکی میڈیا اداروں اور صحافیوں سے ٹیلی فونک رابطہ کیا اور قومی بیانیے کے مؤثر دفاع پر انہیں خراج تحسین پیش کیا۔

عطاء تارڑ نے کہا کہ بھارت نے اپنی شرمندگی اور خفت مٹانے کے لیے پاکستانی چینلز پر پابندیاں عائد کیں۔

انہوں نے کہا کہ بھارتی بیانیہ عالمی سطح پر مکمل طور پر ناکام ہوچکا ہے اور پاکستانی میڈیا نے موجودہ صورتحال میں پیشہ ورانہ مہارت اور ذمہ داری کا مظاہرہ کرتے ہوئے بھارتی پروپیگنڈے کے خلاف مدلل انداز میں پاکستان کا مؤقف دنیا کے سامنے رکھا۔

وفاقی وزیر اطلاعات نے کہا کہ بھارتی حکومت کا یہ اقدام صحافت کے عالمی اصولوں کی صریحاً خلاف ورزی ہے۔ انہوں نے مزید کہا کہ ایسے بھارتی اقدامات سے نہ تو حقائق کو دبایا جا سکتا ہے اور نہ ہی پاکستان کا مؤقف دنیا سے چھپایا جا سکتا ہے۔

مزید پڑھیں: بھارت میں بول نیوز پر پابندی عائد

عطاء تارڑ نے اس عزم کا اظہار کیا کہ حکومت پاکستان بین الاقوامی فورمز پر بھی بھارتی قدغنوں کے خلاف آواز بلند کرے گی۔

انہوں نے کہا کہ حکومت قومی وقار کو بلند کرنے والے میڈیا اداروں اور صحافیوں کی بھرپور حمایت جاری رکھے گی اور ملک کی سالمیت و قومی بیانیے کے فروغ میں معاون ہر آواز کی حوصلہ افزائی کی جائے گی۔

انہوں نے پاکستانی میڈیا کی متوازن اور ذمہ دارانہ رپورٹنگ کو سراہتے ہوئے کہا کہ پاکستانی صحافیوں اور اینکرپرسنز کی خدمات کو سنہری الفاظ میں لکھا جائے گا۔

عطاء تارڑ نے کہا کہ موجودہ صورتحال میں پاکستانی میڈیا نے قومی مفادات کو ترجیح دیتے ہوئے ایک مثالی کردار ادا کیا ہے۔