مودی کا جنگی جنون سر چڑھ کر بولنے لگا ہے، لیکن سرحدوں کے رکھوالے شاہین بھی اپنے وطن کے دفاع کے لیے مستعد اور چوکس ہیں، پاک فضائیہ کے شاہینوں نے مقبوضہ کشمیر کی جانب سے پاکستان میں داخل ہونے کی کوشش کرنے والے بھارتی فضائیہ کے رافیل طیاروں کو بھاگنے پر مجبور کردیا۔

سیکیورٹی ذرائع کے مطابق 29 اور 30 اپریل کی رات بھارتی ایئر فورس کے چار رافیل طیاروں نے بھارتی جغرافیائی حدود میں رہتے ہوئے مقبوضہ جموں و کشمیر میں پٹرولنگ کی، تاہم پاک فضائیہ نے ان جنگی جہازوں کی فوراً نشان دہی کر لی، پاکستانی ایئر فورس کی بروقت اور مستعد کارروائی پرانڈین رافیل طیارے بوکھلاہٹ کا شکار ہو کر راہ فرار اختیار کر گئے۔

سیکیورٹی ذرائع کا کہنا ہے کہ پاکستانی افواج ہندوستان کی طرف سے کسی بھی جارحیت کا منہ توڑ جواب دینے کے لئے ہمہ وقت تیار اور مستعد ہیں۔

گزشتہ روز بھی پاک فوج نے لائن آف کنٹرول (ایل او سی) پر بھارتی کواڈ کاپٹر کی جانب سے پاکستانی فضائی حدود کی خلاف ورزی کی کوشش کو ناکام بناتے ہوئے اسے مار گرایا تھا، یہ واقعہ بھمبر کے علاقے مناور سیکٹر میں پیش آیا جہاں دشمن نے کواڈ کاپٹر کے ذریعے جاسوسی کی کوشش کی تھی۔

واضح رہے کہ بھارت نے مقبوضہ کشمیر کے مسلم اکثریتی علاقے پہلگام میں 22 اپریل کو 26 سیاحوں کی ہلاکت کے بعد 23 اپریل کو سندھ طاس معاہدہ فوری طور پر معطل کرنے کا اعلان کیا تھا۔

بھارت نے پہلگام فالس فلیگ آپریشن کو جواز بناتے ہوئے پاکستانی شہریوں کو 48 گھنٹے میں بھارت چھوڑنے کا حکم دیا تھا جبکہ واہگہ بارڈرکی بندش اور اسلام باد میں بھارتی ہائی کمیشن میں تعینات اپنے ملٹری اتاشی کو وطن واپس بلانے کے علاوہ پاکستان میں تعینات سفارتی عملے کی تعداد میں بھی کمی کردی تھی۔

بعد ازاں، 24 اپریل کو وزیراعظم شہباز شریف کی زیر صدارت قومی سلامتی کمیٹی نے پہلگام فالس فلیگ آپریشن کے بعد بھارت کی جانب سے سندھ طاس معاہدے کی معطلی کے اقدام کو مسترد کرتے ہوئے اعلان کیا تھا کہ پاکستان کا پانی روکنا اعلان جنگ تصور کیا جائے گا اور کسی بھی جارحیت کا بھرپور جواب دیا جائے گا۔

حکومت نے بھارت سے تجارت اور واہگہ بارڈر کی بندش کرنے کا فیصلہ کیا جبکہ بھارتی ایئرلائنز کے لیے پاکستانی فضائی حدود بھی بند کردی گئی اور بھارتی شہریوں کو 48 گھنٹے میں پاکستان چھوڑ دینے کا حکم بھی دیا گیا تھا۔