سائنسدانوں نے ایک انتہائی پیچیدہ اور منفرد تحقیق کی مدد سے انسانی جسم میں پانچ ایسے پروٹین دریافت کیے ہیں جو علامات ظاہر ہونے سے کئی برس قبل امراض جگر کی درست پیش گوئی کر سکتے ہیں۔

اس تحقیق کے نتیجے میں  جگر کے کئی امراض کی بروقت تشخیص اورمؤثر علاج کی راہ  ہموار ہوئی ہے۔

اس تحقیق میں میٹابولک ڈِسفنکشن-ایسوسی ایٹڈ اسٹیٹوٹک لیور ڈیزیز  MASLD پر توجہ مرکوز کی گئی تھی جو اس وقت دنیا بھر میں جگر کی سب سے عام بیماری بن چکی ہے، اور جس میں مسلسل اضافہ ہو رہا ہے۔

اس تحقیق کے لیے محققین نے یوکے بایو بینک کے 50,000 سے زائد شرکاء کے خون کے نمونوں کا تجزیہ کیا اور ان کی صحت کا ریکارڈ 16 سال سے زائد عرصے تک جائزہ۔ انہوں نے خون میں موجود پروٹینز کی اقسام اور مقداروں کا مطالعہ کیا جو زندگی کے بعد کے مراحل میں امراض جگر کو بڑھانے میں مدد گار ثابت ہوتے ہیں۔

2,700 سے زائد پروٹینز کی جانچ کے بعد پانچ پروٹینز  CDHR2، FUOM، KRT18، ACY1، اور GGT1  دریافت کیے جنہیں MASLD کی ابتدائی علامات کے طور پر شناخت کیا جاسکتا ہے۔

حیرت انگیز طور پر ان پانچ پروٹینز نے بیماری کے آغاز سے پانچ سال پہلے 83.8 فیصد جبکہ 16 سال  پہلے 75.6 فیصددرست پیش گوئی کی۔

 جب ان پروٹینز کے ساتھ باڈی ماس انڈیکس  اور روزانہ کی ورزش جیسی کلینیکل علامات کو شامل کیا گیا، تو درستگی میں اور بھی اضافہ نوٹ کیا گیا جو کہ پانچ سال پر 90.4 فیصد اور 16 سال پر 82.2 فیصد ہو گیا۔

محققین کا کہنا ہے یہ تحقیق طب کی دنیا میں ایک اہم تحقیق ہے جو جگر کے امراض سے تحفظ میں مدد گار ثابت ہوسکتی ہے۔