پاکستان شوبز انڈسٹری کی معروف جوڑی ہمایوں سعید اور ماہرہ خان کی نئی فلم ‘لو گورو‘ کے ٹریلر نے سوشل میڈیا پر تہلکہ مچادیا ہے۔

ماہرہ خان اور ہمایوں سعید کی فلم ‘لو گورو’ کے ٹریلر نے ریلیز ہوتے ہی سوشل میڈیا پر دھوم مچا دی ہے، صارفین کی جانب سے ٹریلر کو بےحد پسند کیا جارہا ہے۔

ٹریلر میں ہمایوں سعید ایک ایسے لڑکے کا کردار ادا کرتے نظر آتے ہیں جو لڑکیوں کے ساتھ فلرٹ کرنے میں ماہر ہے اور لڑکیوں کو پھنسانا اس کے لیے بالکل آسان کام ہے۔

ٹریلر میں دلکش مناظر، شاندار عکسبندی، دلچسپ مکالمے اور شاندار اداکاری نے ناظرین کو بے حد متاثر کیا ہے۔

فلم ‘لو گورو’ کی شوٹنگ پاکستان سمیت برطانیہ میں کی گئی ہے جبکہ اس کی کاسٹ میں دیگر بھی نامور اداکار شامل ہیں۔

میکرز نے اپنی پوسٹ میں اعلان کیا ہے کہ فلم کو عید الاضحیٰ پر ریلیز کیا جائے گا، ساتھ ہی شائقین کو یہ پیغام دیا گیا ہے کہ وہ ایک ایسی کہانی کے لیے تیار ہو جائیں جو انہیں ہنسائے گی، رلائے گی اور دوبارہ محبت کے جذبے سے روشناس کروائے گی۔

فلم ‘لو گورو’ کے ٹریلر کے بعد سوشل میڈیا پر مداحوں کی جانب سے بھرپور ردعمل سامنے آرہا ہے، ایک صارف نے تبصرہ کیا کہ ہمیں اپنی فلم انڈسٹری کی حمایت کرنی چاہیے، اللہ کا شکر ہے کہ ہمارے پاس ماہرہ خان اور ہمایوں سعید جیسے باصلاحیت ستارے موجود ہیں۔