لاہور: جمعرات کی صبح لاہور کے نواحی علاقوں والٹن، گوپال نگر اور نصیر آباد یکے بعد دیگرے تین زوردار دھماکوں سے لرز اٹھے، جس کے نتیجے میں شہر بھر میں شدید خوف و ہراس پھیل گیا۔

عینی شاہدین کے مطابق تین زوردار دھماکے پرانے ایئرپورٹ کی سمت سے سنائی دیے، دھماکوں کی شدت اتنی زیادہ تھی کہ کئی گھروں اور عمارتوں کے شیشے لرز اٹھے جبکہ مقامی شہری خوفزدہ ہو کر گھروں سے باہر نکل آئے۔

پولیس اور ریسکیو ٹیمیں فوری طور پر جائے وقوعہ پر پہنچ گئیں اور علاقے کو گھیرے میں لے لیا، بم ڈسپوزل اسکواڈ کو بھی طلب کر لیا گیا ہے تاکہ دھماکوں کی نوعیت کا تعین کیا جا سکے۔

 پولیس کے مطابق تاحال کسی جانی نقصان کی اطلاع موصول نہیں ہوئی، تاہم شواہد اکٹھے کیے جا رہے ہیں اور تفتیش جاری ہے۔

عینی شاہدین کے مطابق پہلا دھماکہ صبح تقریباً 7 بجے کے قریب ہوا، جس کے چند لمحوں بعد مزید دو دھماکے سنائی دیے۔

 ایک مقامی رہائشی نے بتایا کہ ہم اپنے گھروں میں سو رہے تھے کہ اچانک زوردار آواز آئی، ایسا لگا جیسے زمین ہل گئی ہو، بچے اور بزرگ سب خوفزدہ ہو گئے۔

لاہور اور سیالکوٹ کی فضائی حدود معطل

دھماکوں کے فوری بعد سول ایوی ایشن اتھارٹی نے حفاظتی اقدامات کے تحت لاہور اور سیالکوٹ کی فضائی حدود کو عارضی طور پر معطل کر دیا۔

ذرائع کے مطابق متعدد اہم فضائی راستے کمرشل پروازوں کے لیے بند کر دیے گئے ہیں اور یہ پابندی دوپہر 12 بجے تک برقرار رہے گی۔

علاوہ ازیں مدینہ منورہ سے لاہور آنے والی ایک بین الاقوامی پرواز کو بھی لاہور کی بجائے کراچی کی طرف موڑ دیا گیا ہے۔

بھارت کا بزدلانہ حملہ، پاکستان کا منہ توڑ جواب

واضح رہے کہ بھارت نے 6 اور 7 اپریل کی درمیانی شب اندھیرے میں پاکستان کے شہری علاقوں پر حملہ کر کے کشیدگی میں خطرناک اضافہ کیا تھا، پاک فوج کے شعبہ تعلقات عامہ (آئی ایس پی آر) کے مطابق اس حملے کے نتیجے میں 31 معصوم شہری شہید اور 57 زخمی ہوئے۔

بھارتی حملے کے فوراً بعد پاکستان کی مسلح افواج نے بھرپور جوابی کارروائی کرتے ہوئے بھارتی فضائیہ کے پانچ جنگی طیارے اور تین رافیل مار گرائے، اس کے ساتھ ساتھ دشمن کے ایک بریگیڈ ہیڈکوارٹر اور متعدد فوجی چیک پوسٹوں کو بھی نشانہ بنا کر تباہ کیا گیا۔

بعد ازاں عسکری و سیاسی قیادت کی جانب سے واضح کیا گیا کہ یہ ردعمل صرف ابتدائی دفاعی اقدام تھا اور اصل جواب ابھی باقی ہے، تاہم وزیراعظم نے قومی سلامتی کمیٹی کے اجلاس میں مسلح افواج کو مکمل اختیار دے دیا کہ وہ وقت، جگہ اور دستیاب وسائل کا تعین خود کریں اور بھرپور جوابی کارروائی کریں۔