ٹیسٹ رینکنگ میں کوئی بھی پاکستانی بلے باز ٹاپ 10 میں جگہ نہ بنا سکا، بابر اعظم ناقص کارکردگی کے باعث ٹاپ 20 سے بھی باہر ہوگئے، سعود شکیل 739 پوائنٹس کے ساتھ گیارہویں نمبر پر موجود ہیں۔

آئی سی سی کی جانب سے جاری کردہ ٹیسٹ رینکنگ کے مطابق انگلینڈ کے جوروٹ 895 پوائنٹس کے ساتھ پہلے نمبر پر براجمان ہیں۔

انگلینڈ کے ہی ہیری بروک نے 876  نمبر کے ساتھ دوسرے نمبر پر قبضہ جما رکھا ہے، جبکہ 867 پوائنٹس کے ساتھ نیوزی لینڈ کے کیم ولیمسن تیسرے نمبر پراجمان ہیں۔

پاکستان بلے بازوں کی بات کی جائے تو قومی کرکیٹر سعود شکیل 739 پوائنٹس کے ساتھ گیارہویں نمبر پر موجود ہیں، جبکہ محمد رضوان 671 پوائنٹس کے ساتھ اپنی چودہویں پوزیشن برقرار رکھنے میں کامیاب رہے ہیں۔

یہ بھی پڑھیں: پاکستان کا خوف حاوی، بھارت آئی پی ایل میچز کے وینیوز تبدیل کرنا شروع

تاہم، اسٹار کرکٹر بابر اعظم کی رینکنگ میں تنزلی ہوئی ہے اور اس تنزلی کے بعد بابر اعظم 651 پوائنٹس کے ساتھ ٹاپ 20 کی فہرست سے نکل کر 21 ویں نمبر پر چلے گئے ہیں۔

جنوبی افریقا کے خلاف بابر نے دو ٹیسٹ میچوں کی سیریز کے دوران چار اننگز میں 193 رنز بنائے تھے جس میں تین نصف سنچریاں شامل ہیں۔

ویسٹ انڈیز کے خلاف ہوم سیریز میں بابر کی کارکردگی اچھی نہیں رہی اور انہوں نے چار اننگز میں صرف 45 رنز بنائے اور ان کی رینکنگ متاثر ہونے میں اہم کردار ادا کیا۔

دیگر پاکستانی بلے بازوں میں معمولی بہتری دیکھنے میں آئی۔ سلمان آغا 592 پوائنٹس کے ساتھ 32 ویں، شان مسعود 542 پوائنٹس کے ساتھ ایک درجہ ترقی کرکے 46 ویں اور عبداللہ شفیق 520 پوائنٹس کے ساتھ 53 ویں نمبر پر آگئے ہیں۔