چیئرمین واپڈا انجینئرلیفٹیننٹ جنرل (ر) سجاد غنی نے نیلم جہلم ہائیڈروپاورپروجیکٹ کا دورہ کیا اور نوسیری ڈیم سائٹ پر بھارتی حملے سے ہونے والے نقصانات کا جائزہ لیا۔

اس موقع پر انہوں نے بھارتی حملے کی شدید مذمت کرتے ہوئے کہا کہ عالمی قوانین جنگ کے دوران بھی آبی ڈھانچوں پر حملوں کی اجازت نہیں دیتے۔

چیئرمین واپڈا نے اپنے بیان میں کہا کہ بھارت کی جانب سے اس حملے کا مقصد نہ صرف پاکستان کی توانائی کے بنیادی ڈھانچے کو نقصان پہنچانا ہے، بلکہ اس سے خطے میں پانی کی فراہمی کے نظام کو بھی متاثر کرنے کی کوشش کی گئی ہے۔

مزید پڑھیں: بھارتی بری فوج بھی ناکام، پاکستان نے رافیل طیاروں کے بعد اسرائیلی ڈرونز بھی تباہ کر دیے

ان کا کہنا تھا کہ عالمی سطح پر اس قسم کی کارروائیوں کی اجازت نہیں دی جا سکتی اور اس پر عالمی برادری کو سنجیدہ اقدامات اٹھانے کی ضرورت ہے۔

چیئرمین نے ڈیم سائٹ پر تعینات واپڈا کے ملازمین سے بھی ملاقات کی اور ان کی حوصلہ افزائی کی۔ انہوں نے کہا کہ ڈیم سائٹ پر تعینات ملازمین کی فرائض کی انجام دہی میں ان کی لگن اور جرأت قابل تعریف ہے۔

 اس موقع پر انہوں نے ان ملازمین کی پروفیشنلزم اور عزم کو سراہا اور انہیں یقین دلایا کہ واپڈا کی انتظامیہ ان کے ساتھ کھڑی ہے۔

چیئرمین نے اس عزم کا اظہار کیا کہ واپڈا اس مشکل وقت میں بھی نیلم جہلم ہائیڈروپاورپروجیکٹ کی مکمل بحالی کے لیے ہر ممکن کوشش کرے گا تاکہ پاکستان کی توانائی کی ضروریات کو پورا کیا جا سکے۔